【過夜新玩法】全新兩手fing-fing去露營2.0 豪住Glamping
2016-05-15
一見到Glamping唔知大家有沒有彈咗個問號出嚟？其實Glamping即係glamorous camping，豪華露營，專為有潔癖嘅山系朋友而設，目前喺非洲和澳洲非常盛行。近日香港都有地方俾大家 Glamping試玩，而且乜都唔使帶，兩手fing-fing 帶埋全家人出現就得。
事關近日YHA昂坪戴維斯青年旅舍推出「兩手fing-fing去露營2.0」，給露營初哥提供多個選擇。他們引入了歐洲流行的Bell Tent (圓帳營)，比一般帳營大4-5倍，最多可容納10人。帳營外觀為純麻色，遠處看像是一個迷你馬戲團帳幕。喜歡的話，更可自行佈置帳營，增添個人風格。物料方面則用上防水防潮的帆布，就算是潮濕天氣也不用怕！
帳幕帶點波希米亞的簡樸風格。
喜歡的話，更可自備三角小彩旗、LED串燈等裝飾，為帳營注入個人風格。
講到明乜都唔使帶，當然唔止提供一個幕咁簡單，除了帳營之外，裏面已預備好枕頭、牀鋪、小茶几等。爸爸媽媽就毋須忙住湊仔湊女之餘，又要帶住一包二包上山先可以體驗露營的樂趣啦。露營以外，旅舍內的廚房（設有冰箱）和浴室亦供住客隨便使用，大熱天時囝囝囡囡出晒汗都唔怕焗親唔舒服啦！
如果各位唔介意自備食材的話，可以與家人朋友玩玩「煮飯仔」，在閃爍星空下享受露營大餐。唔想煮飯仔，可以免費借用燒烤爐，但要預訂。懶到連食材都唔想自備，旅舍小賣部亦提供各式飲品、即食麵、罐頭等供住客購買，豐儉由人。
營地距離天壇大佛、寶蓮寺、心經簡林、昂坪市集等景點僅5-10分鐘步程，環境寧靜清幽，啱晒都市人週末前來放鬆身心。有心有力的話，附近還有昂坪棧道、彌勒山等多條熱門登山徑，供遊人遠足郊遊，旅舍亦正正位處全港第二高峰鳳凰山的山腳，特別方便上山觀賞「最美日出」。
Glamping 嘅時候，帶住小朋友嘅爸爸媽媽一方面可以俾佢哋親親大自然之外，又唔使怕小朋友亂晒咁嘈騷擾到其他人，一早起身成家人都可以吸一口新鮮空氣，真係聽到都躍躍欲試呀。但想試還想試，無論大家係2人行定係4人行，都起碼要有一位參加者係YHA會員先可以使用場地設施。不過，如果無朋友係會員又唔使怕嘅，因為到達營地先立即登記成為會員亦得，每位成人會費則為$150，一家幾口去多一兩次都回本啦！
兩手fing-fing去露營2.0：豪住Glamping
詳情：入住昂坪旅舍Bell Tent (圓帳營)，備有枕頭、牀鋪及小茶几，並可無限次使用旅舍廚房及浴室
參加人數：1-10人（每營）
價錢：1-3位：總數港幣$ 560（特惠時段） / $630（繁忙時段）
其後每位另加港幣$ 130（特惠時段） / $150 （繁忙時段）
（每4位須有1位為YHA會員，如此類推）
註：以上價錢為會員價，而此優惠只適用於YHA會員。每位YHA會員可帶同3位非會員入住。訪客可以即場申請成爲會員。
預訂方法：(1) 致電2788 1638
(2) 電郵至 [email protected] （請附上預訂表格）
網上圖片