手動轉胎+生產記@│Yennie Darkins
2021-09-22
小妹於20/9出世啦！
以為第四胎，自己知道一切嘅時候…
其實每一次懷孕都唔同，都有學習嘅地方。
呢個妹妹因為36週仍未掉頭，上星期四（37週）我入咗院做手動調頭（ECV)
天真以為5分鐘攪掂走得，但原來事前要做好多檢查，事後要留院一晚。
前一日要交檢測報告（我喺星期三交咗口水）。
當日7點禁食，8點半入院時，要磅重、量血壓、照超聲波睇BB位置同大細（約2.3kg)、臥牀測BB心跳、陣痛同胎動。
十點半左右打豆。護士幫我打左手，佢又抽又插又抽又插…結果插爆咗條血管（我知佢唔想，我無怪佢），但跟住打右手時，我就開始暈…眼前一黑，有啲耳鳴，講野都無力…
呢幅係五日後影嘅⋯被插爆血管後嘅瘀況
我瞓番喺牀到休息咗陣就無事。
一點上產房時，有成十個人喺房準備ECV， 個陣容我係嚇親㗎🙈佢哋再檢查亞女位置(超聲波）、心跳等，知道臍帶唔喺下面，就喺我肚到落gel ，由兩個醫生負責轉。一個捉住個頭，另一個剷起咗對腳，然後順時針轉…過程中，護士不段提我，痛的話可以吸笑氣，但真係唔痛，我無吸過～好快就搞掂咗！可能我個肚大、亞女細，所以轉時唔痛啦！
佢哋用超聲波確認bb轉咗落嚟、無宅住臍帶、bb心跳正常先離開。我就自己喺產房呆等（被觀察）兩個鐘
檢查bb心跳、陣痛同胎動，正常先轉返去產前病房。
結果梗係正常～跟住我去返產前房，期間要檢查我血壓、bb心跳、陣痛同胎動兩至三次，每次半個鐘
第二日都正常先走得。
就喺呢一晚開始，我就有陣痛，每5分鐘一次，有成個幾鐘都係咁🙈我以為自己生得
助產士話，通常做完ECV，bb都要啲時間入盤，唔會咁快生。
我翌日出咗院。接下嚟嘅兩日，我斷斷續續咁有每5分鐘一次嘅陣痛。但我無入院，因為我知我入的話，有排等，又無老公陪。
你望下啲陣痛密到個app係咁叫我去醫院～
直到
星期日凌晨2點，我感到有啲啫喱狀嘅嘢流咗出嚟，但我都照瞓。有陣痛都瞓（有時會痛醒）。到6點時去廁所…發覺都幾多液體流出，原來穿咗水🙈跟手見埋紅。
我前三次都係陣痛入院，要人工穿水，我都係第一次咁穿法～
我去整醒我老公，佢個樣好好笑😂
彈起身話：「去醫院啦！」
7點去到醫院產房，檢查晒基本野後，我又去返產前護理房待產。
老公打咗兩針疫苗，但未夠14日，佢之前都有隔三日去做檢測，但因為星期六我痛到以為自己會入院，但又住入，佢就無去做檢測🙈咁我入院時佢就陪唔到產。佢即刻走咗去私家到做檢測，等三個鐘有結果先入得產房。我知佢未入得，但醫生已經推咗我入產房催生…我就叫佢哋唔好落唔多藥🙈我要等埋我老公。產房唔開後手提電話，每次搵老公都要借電話打。
佢知自己唔入得產房住，又知道要等…我打俾佢時佢竟然去咗返工😑唔知好嬲定好笑😂
到佢入到嚟產房，都差唔多三、四點。
嗰刻佢捉住我隻手❤️捉咗一陣後，就坐到老遠、最舒服嗰張椅瞓覺😂都知佢瞓唔夠㗎啦～由佢瞓啦！
落完催生藥，陣痛愈嚟愈密同痛，我一路都有吸gas and air。一點半左右仲打埋止痛針。其實生影曦靖翹時我都有打無痛，生舒韻時因年初二無咩人返工，打唔切。今次我由入產房一劇（十點半）開始問，佢哋講咗好多風險嘢，我話明白，我都堅持要打。佢哋話要睇返陣痛情況同宫頸開咗未先得…仲要睇下麻醉師得唔得閒過嚟…如是者，我每隔一段時間就問，終於喺夜晚8點時，喺宮頸一度都未開嘅情況下幫我打咗無痛（喺背脊脊椎插支針入去做半身麻醉）。我明白麻醉師手勢次次都唔同。而今次…佢係完美完成半身x半身麻醉，即係我下半身嘅左邊唔痛，但右邊仍然痛。唔知大家知唔知，每生一個B，陣痛係會愈痛嘅🙈所以今次即係只有下半邊痛，都仍然好痛！
打咗無痛後，陣痛係疏咗。直到十一點左右，宮頸先開始開。我同老公仲係到諗，究竟BB會係19號定20號出世呢？
（其間，老公仲話，想我快啲生…因為佢怕無車返屋企😑佢好肚餓，又好眼瞓💤好想打佢😂不過我一向都知佢係咁～如果佢話：想你快啲生，唔想見到你咁辛苦…你話會浪漫幾多呢？）
結果係，過咗12點，我開始感覺到有想推嘅感覺。我等多幾下先按掣叫人入嚟，佢地已經話，BB頭仔雖然未落晒嚟，但你可試下push.
每一下陣，我吸到三啖氣左右咁推，推咗五次，15分鐘左右，亞女就出咗嚟～ （生影曦時push 咗三下，6分鐘出咗嚟）
亞女得2.38kg, 5磅多少少。不過健康就夠啦！
老公喺我push 嘅時候好冷靜咁企咗喺房嘅角落，一個我見唔到佢嘅地方😂一向怕血嘅佢，佢在場又無暈，我已經覺得佢做到好好。
我哋喺產房留多咗一個鐘左右。試埋埋身餵人奶我先被推落產後房。
*講住咁多先，遲啲再續～
相關文章：