【生第二胎】懷孕迷思，兩胎最好隔幾遠？︳Kylife
2020-05-21
每位小朋友的誕生降臨都係天賜，好多父母預備好但未必一定預期出現，不過我知好多父母都有自己一套的生仔時間計劃！由我生第一胎之後，身邊唔少人問幾時生二胎。其實我生完筋肉寶寶後，我同老公都有計劃，只係當時屋企發生咗啲事，所以計劃暫時hold住，到宜家三年後當然好開心有二胎啦！
我身邊計劃生二胎的父母都會諗定兩胎想隔幾遠，我聽過有啲會話想隔一年至年半，有啲就會想隔兩年到四年。
隔一年到年半我覺得係唔錯的選擇，首先做新手父母辛苦開餵夜奶同日夜貼身照顧模式，所以繼續都會覺得比較容易。其次，兩胎隔的時候較短，媽咪啱啱經歷完懷孕同餵母乳，身體上不適感會較初次懷孕較容易適應。另外用品上消費肯定慳一筆，因為好多設備有齊唔洗再買！
不過除咗照顧第二個BB比較容易外，大前題係要再處理好第一個小朋友的Trouble Two情緒上變化，相信都唔係易事！！
隔兩年到四年都係唔錯的選擇，因為第一個小朋友開始比較懂事，已經返緊N班或k班的階段，咁父母可以分散注意力落二胎身上。而第一個小朋友透過上堂學習同其他小朋友相處，相信同細佬妹相處上應該較簡單同易處理！而用品上消費相信都唔會太多，因為想生二胎的媽咪總會留定好多BB用品而唔捨得唔要！
不過當然有好有唔好啦，我聽唔少朋友講小朋友一開始返學特別容易病，如果屋企有第二個小朋友就更易感染到，所以係預防感染同增加抵抗力方面就要下功夫啦！
除以上兩種，有唔少父母係等待二胎中可能都有五年或以上，依個階段我相信父母真係會比較辛苦，首先媽咪年紀大咗，懷孕期不適會感覺比第一胎辛苦！另外父母要重新適應初生階段模式，而第一位小朋友就快入小學要處理面試，或者返緊小學需要父母睇功課，相信父母本身都肯定好忙。
不過無論係邊種，做父母都要預早有精神同經濟上的付出準備，為兩位小寶貝努力維繫整個家，咁家庭就會比較幸福！而我同老公都努力學習中，首要等筋肉寶寶同肥寶接受二胎即將來臨，出世後再教導佢哋相處等等，希望佢哋相處上都可以融融洽洽啦！！
懷孕中看到筋肉寶寶的成長，令我更期待二胎BB的加入！
想睇晒我所有簡單食譜分享記得拉到最落！
每週小煮意食譜、二寶日常點滴、親子好去處、大家記得要follow呀！
喜歡玩IG的朋友記得Follow：kylife.babies
面書專頁：Kylife與二寶之日常
作者：Kylife
其他文章﹕