【孖吉媽媽】病在兒身痛在母心 孖吉第一次住院記
2018-07-23
自孖吉一歲後，就開始病多咗，繼7月頭發高燒（最高40.1度）後，2星期後再一次發燒（大約38.6度）。今次估計係因為婆婆帶咗孖吉去大澳玩，婆婆份人好「好客」，見個孫可愛就任人抱，所以可能經其他人交叉感染，病徵係發燒、嘔吐和呼吸困難。
去完大澳返嚟嗰晚，就發現孖吉瞓覺時發出好大聲嘅鼻塞聲、同埋用口呼吸；第二朝開始發燒，就算食咗退燒藥都冇退，而且食奶會嘔，食固體又冇胃口，全日都好忟憎。之後孖吉爸帶咗孖吉去私家睇症，當時醫生診症後寫紙，認為要即時帶孖吉去急症，當時我仲喺辦公室，知道後擔心到喊咗出嚟，就即刻去QE會合孖吉爸。
去到QE急症室，經分流後好快見到急症室醫生，醫生亦都建議要入院觀察，之後就去照肺部X-ray。
