生活百科｜十個收拾小技巧 唔使再幫小朋友執手尾！
2024-09-24
小朋友成日冇手尾，玩起上嚟又咩都唔理，搞到屋企笠笠亂，點到你氹氹轉？呢到介紹十個收拾整理的小技巧，爸媽們活學活用冇煩惱！
1.囡囡將頭飾四圍擺，啲橡筋又好似有腳咁，成日唔見？
用鎖匙扣串起橡筋，方便企理！
2.吹泡泡咁開心，但一唔留神就倒瀉……
落公園時帶卷封箱膠紙，將泡泡瓶身痴上牆/柱，就唔驚倒瀉冇得玩！
3.每次畫水彩都好似打仗咁，畫完又要洗顏色碟好麻煩？
下次買雞蛋一於儲起個盒，可以將顏色分開一格格，畫完又唔使慢慢洗。
4.沐浴露一支支放係到，小朋友鍾意擠完呢樣搞嗰樣？
喺浴室高處裝一支橫杆，掛起一個個籃仔，分開小朋友用嘅沐浴用品，每次沖涼再幫小朋友攞落黎，就唔怕小朋友再搞搞震！
5.去郊遊帶午餐盒，拎出嚟全部食物撈埋一齊，唔好睇又唔想食？
用多格食物盒，就唔怕食物撈埋一堆，整齊美觀之餘，仲可以將正餐、生果同糖果放埋一齊，唔使再分幾個盒！
6.食物包裝一開，就倒到成地都係？
下次儲起牛奶/果汁盒個蓋，將佢貼係普通樽上面，就可以好方便咁擰開樽蓋倒食物，唔驚倒瀉。
7.小朋友一做勞作，件衫就唔洗要？
可以係小朋友開始佢嘅大作之前，貼張保鮮紙係身上面，以免整污糟件衫，如果保鮮紙唔夠力，亦可以用衣夾夾實。
8.去旅行要幫小朋友執衫，但衫仔太細成日唔知攝咗去邊？
用保鮮袋將逐套衫Pack好，唔使諗點襯之餘，仲一搵就搵到！
9.BB用品太多，有時都唔記得邊樣打邊樣？
用小型儲物櫃筒一格格分好，拎出嚟就快而準喇！
10.塑膠玩具/牙膠易有霉菌？
為咗杜絕霉菌，可以用熱熔膠封住玩具嘅氣孔，以免入水引致霉菌滋生。
資料及相片來源：Buzzfeed
相關文章：