【VVinnie】堅‧離地幼稚園生活
2016-08-27
啟示
我第一幅圖數錯咗，
應該有7個小朋友，
誤導了大家唔好意思🙇🙇
近來大家有冇睇關於免費幼稚園教育嘅廣告呢？
我就成日都睇到喇！
睇到呢個廣告，
就知拍嗰個人，
身邊一定冇幼稚園嘅老師朋友，
但我相信，
亦都係大眾對我哋嘅印象！
所以就會咁拍出嚟！
唔通拍寫實版打仗咁咩？
不過真係太唔寫實啦😎
｛1.點會得本書上堂？空間仲咁大？｝
幼稚園上主題課，
係嘅，
你可以分組分得佢哋細組一啲，
但應該都唔會得幾個小朋友上堂，
何況我睇到唔單只係人數嘅問題，
平時分組上堂個位置，
邊有咁大啊？
如果真係得6、7個，
會有咁大個位？
最重要嘅係，
老師上堂就係攞住本主題書？
邊有咁簡單呀！
仲有啲教具、手偶呢？
淨係攞住本書教？
咪玩啦！
真係淨係教ABC咩！
上一堂，
好多嘢預備架！
｛2.着high heel上體能？｝
邊會有人着高踭鞋去上堂架！
低能都知唔會啦！
一班30個小朋友，
要玩分組要組織性活動，
仲着高踭鞋！
入嚟玩吓就得，
真係去教喎，
着運動衫波鞋啦！
相信片入面嗰個係代表高層，
但係又有幾多個高層真係會入班呢？
仲要玩個咁危險嘅遊戲，
我哋係唔會叫小朋友搭着膊頭，
然後拉住佢哋跑嘅，
咁樣係好易跌親同埋拉跌晒全部人！
我可以好肯定，
現實嘅情況如果俾小朋友搭晒膊頭玩呢個遊戲，
佢哋係會勁快咁樣跑同推，
然後就會發生事！
我諗外界真係好大嘅誤會，
以為我哋一定會玩火車捐山窿，
又以為着高踭鞋玩體能係件好平常嘅事！
｛3.乖乖哋玩！｝
平時都會同小朋友分組，
面對一大堆嘅玩具，
其實小朋友都會好乖，
識得拎玩具返位玩，
不過呢，
有時候，
佢哋就未必識得分享喇！
呢個就係要教佢哋！
當然，
好多小朋友經過學習，
佢哋係會學到！
對於玩具嘅玩法，
亦係你意想不到嘅！
你諗下，
你日日都對住嗰堆玩具，
你又點會用同一個玩法去玩呢！
所以啲小朋友都好有創意，
佢哋會用佢哋自己嘅方式去玩玩具！
我相信片入邊嘅玩具，
如果係真實，
一定唔會放喺枱面度玩，
做老師嘅我都唔會咁安排，
因為咁大嚿嘅積木，
係好應該放喺地下玩！
同埋我好相信小朋友，
唔會淨係將啲積木疊高，
佢哋係會創作唔同嘅嘢！
*我相信我講咁多，
一定會有人好不爽話我！
可能會話：你唔識得教啫！
可能會話：教識佢哋係你責任呀嘛！
可能會話：拍個廣告啫，使唔使咁認真呀！
不過今次我只係想講出，
相信呢個廣告正正係大眾對我哋嘅印象:
幼稚園老師係坐喺度講故事，
幼稚園老師係同小朋友玩下遊戲，
幼稚園老師分組係坐喺度；
小朋友係會坐定定，
小朋友係好守規則，
小朋友係會乖乖跟你咁玩玩具。
睇到廣告，
我都覺得幼稚園老師好好做呀！
不過真實，
你懂的。
#廣告都係好美化生活
#大眾認為幼稚園老師好得閒
#真係唔該哂
#幼稚園老師
#VVinnie
作者：VVinnie