【炒米媽媽】小米卷之出世前夕
2016-08-09
搶閘出世的BB — 產假未未開始，BB就出來了！
那夜是一個雷電交加的晚上，半夜被雷聲叫醒了，覺得肚仔有少少痛。大肚婆半夜醒，極之平常。難得的是，老公都醒了。以下是我們的對話：
我 ：個肚有d痛，係咪作動？
老公：你諗多左，訓覺啦。
跟著我起身去廁所…
我 ：老公，見紅呀！
老公：吓真嫁？咁點呀？去醫院？好大雨
我 ：我想沖涼同食公仔麵 (介左口好耐)
老公：好
老公煮煮下麵，大叫:包公仔麵過左期！
我：乜我們連公仔麵都過期…
幾經辛苦…終於 响櫳底找到一包沒有過期的公仔麵。
兩份食了，帶埋走佬袋，出發！
＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿＿
0600 去到醫院，做了些檢查後，醫生話未有耐生得，被送到待產室。
1230 維持十分鐘痛一次，每次痛30秒左右，還可以如常食飯睇電視。
1400 陣痛加強
1430 姑娘救命！但姑娘話未有耐
1500 開始大叫
1530 隱約聽到隔離床的準媽媽說「希望我唔好咁快生」
1600 姑娘，我好急⋯⋯
1610 姑娘說：「可以入產房了」
1630 產房中，醫生問：「要不要老公陪產？」我說：「要！」醫生說：「那麼我要忍住，唔好用力。」
1640 老公終於進來了，那十分鐘好像一個世紀。
1645 一輪的嘶叫。醫生教我呼吸同吸笑氣，但我好像不能呼吸。醫生問我點解放低笑氣，我話吸唔到。跟住有姑娘話「壞左」。（一個謎）
1700 推、推、推
1710 生左。當聽到BB喊聲時，第一反應係:嘩！咁快既。
1730 醫生問：「點解咁遲先入產房？」我說：「因為姑娘話未得。」心想你估我想的嗎。醫生說：「下胎請早。」
1735 姑娘說：「原來部機未插掣，怪不得無笑氣。」我心想：「拍戲咩，咁都得！」
1750 小米卷放在我的身上了，巧細粒，巧可愛。喜悅已蓋過痛楚。
小米卷，我和糯米爸爸真的好鍾意你，喜歡你依偎我們的感覺。我永遠都會記得姑娘第一次將你放在我身上的感覺。我們愛你！
寫於15年9月
作者：炒米媽媽