艾威直播企足9粒鐘 只為太太籌集醫藥費 被苑瓊丹爆為老婆：「佢搏老命！」

早前艾威簽約內地直播平台慶豐年，更預支50萬酬勞，為太太籌集醫藥費。日前艾威進行「處子直播」，好友苑瓊丹、林敬剛、李焯寧亦現身撐老友，認真有情有義！

預計賺取6位數酬金

呢日艾威獲得不錯成績，超過100萬營業額，預計他能賺取6位數酬金：「都習慣嘅，多謝大家嘅支持啦！呢個係新嘅嘗試，希望觀眾聽得明我地啲『港普』，經過今次多咗信心，下次會做得更好！」

鏡頭前敬業 鏡頭後為太太憂心

艾威鏡頭前後表現自若，但苑仔就透露好友原來「死撐」：「其實威嫂呢日要做小手術，綵排時見佢不停同醫生、家人講電話，不時憂心忡忡，但埋位就好敬業，佢為咗效果好企足9小時，為咗太太佢真係『搏老命』！」苑仔亦大讚好友直播夠氣氛，眾人直播到凌晨後，安排專車艾威返港，以便翌日照顧太太。