【呀劍萬帥】荔枝角 亞馬遜森林歷險樂園Amazon Adventure @弘景臺

今日係哥哥同學仔生日會, 我哋去咗佢屋苑既會所慶祝, 嘩! 跟住俾我發現原來會所裡面有個Play House喎! 

同學仔一家非常細心預備整個生日會，有各式各樣攤位遊戲、水印貼紙服務、畢業禮表演回顧、仲有超級豐富美味到會！
……所以我從未幫大少爺同千金攪過生日會！

有個麥Queen水印貼紙，芊芊好開心好興奮呀！(但係番到屋企想卒甩佢嗰陣痛到喊)

覺得自己好似嚟咗個嘉年華咁，有得食又有得玩！

呢對兄妹真係一時糖黐豆，一時水溝油！

生日會中有個靚靚吹汽公主，梗係要同佢影番張靚相啦！

到咗期待而久嘅節目嚟啦，就係大家一齊去弘景臺嘅室內兒童遊戲室

一D都唔講得笑，成個Playhouse搬咗過嚟咁，差唔多5-6米高嘅樓底，有着各種唔同類型嘅設施！

當然小朋友自動波去玩，只係要睇住芊芊先至一路跟住佢上去

呢條傳說超刺激嘅瀡滑梯，成2-3層樓咁高，真係瀡落嚟個速度唔知有冇80 kilo!

每個小朋友瀡落嚟嗰陣，個Pat Pat都係撞落個軟墊度再翻彈上嚟，你話勁唔勁！

但係要上去呢個滑梯就要爬番咁上下嘅迷宮先可以到達最頂層！

正所謂「瀡落1秒鐘，爬上10分鐘」，真係辛苦得嚟至在瀡

我瀡…..瀡咗落嚟嘅小朋友要快D起開，如果唔係就俾從後瀡落嚟嘅小朋友撞到Pat Pat都開花

芊芊瀡咗落嚟之後仲笑笑口…快D走啦，後面嚟緊啦！

另一邊又有一條滑梯，不過唔可以叫滑梯，因為一D都唔滑！但係就安全好多

其實屋苑會所見得多，有一個咁大咁有規模嘅室內兒童遊戲室真係好少見！當然大前提要有朋友住喺度你先有機會嚟玩啦！住喺度嘅朋友仔真係幸福~~

Photo by CANON 5D Mark III, Len | EF 24-70mm f2.8L USM

想跟我去體驗其他活動，快D報名親子團，同埋留意專頁公佈詳情啦！

http://goo.gl/forms/CNZMEPoMIWkouK8o2

呀劍評分: 10分

呀劍評語: 一個屋苑會所裡的親子室內遊樂場，同外面商場Playhouse簡直有得Fight! 正所謂識人好過識字，識一個弘景臺朋友可以慳番唔少錢！

(以上資料更新至文章當日)

Facebook專頁: 呀劍萬帥 kimfamilytraveltips
Blog網誌 : kimfamilytravel.blogspot.hk

作者：呀劍萬歲