【名人爸爸】喬寶寶唔做港爸：阿仔開心健康就得！
2016-07-27
兩仔爺Friend過打band
印度籍的喬寶寶全名係Gill Mohinderpaul Singh，19歲返鄉娶咗太太Gurinder Kaur Gill，婚後育有兩子Inderpal及Arvin。大仔Inderpal已經大學畢業，喬寶寶開心咁話：「我個仔三年大學拎咗兩年scholarship，幫我慳唔少錢，佢好生性，我都好錫佢。」
大仔Inderpal明年準備結婚，喬寶寶講到明恨抱孫。
兩父子感情好到好似兩兄弟，佢話：「我哋Friend過打band，十四、五歲我就帶佢落老蘭（蘭桂坊）見識，唔係要帶壞佢，反而係開門見山俾佢知道，呢個係一個咩地方，唔使心思思，自己去亂撞仲煩。」結果阿仔去到，連威士己同可樂都唔識分，見過世面，發現不外如是，就乖乖去讀書。
螢幕上愛搞笑的喬寶寶，竟然係嚴父一名。佢賞罰分明，父子關係好到不得了。「大仔出年結婚，話唔定我可以抱埋孫。（一個要四百萬喎？）所以我要去蘇格蘭囉，個度物價正常啲。」雖然佢呵呵呵咁笑住講，但選擇離開佢嘅成長地～香港，其實係迫不得已。
細仔患病所以返蘇格蘭
細仔Arvin出世後，成家人原本好開心。「我阿爸擔心回歸後出現變化，九七前一早幫我哋幾個仔女搞移民去唔同嘅英聯邦國家，話個度點都一定搵到印度同胞，可以互相守望相助。結果2003年香港爆發SARS，我驚我阿媽、老婆同大仔有事，就送佢哋過去先，細仔就喺嗰度出世。直到一歲，發現咗佢脊椎神經線出問題。」
於是細仔開始長期做物理治療，以及多做伸展運動，甚至大腿小腿都打botox鬆筋，希望改善病情。「佢喺蘇格蘭出世，在香港沒津貼，要睇私家醫生，後來加上他有過度活躍症，需要接受治療，每個月我六、七成人工咁就用咗去。做父母嘅，想佢好，無計。」
面對患病的兒子，喬寶寶話要讚佢太太：「太太曾經感到無助失落，但一點都唔放棄阿仔。最初佢知個仔有過度活躍症，仲要轉介去特殊學校讀書，當然唔係好接受。不過我好知足，盡量用輕鬆的心情去面對，開心又一日，唔開心又一天，兩公婆最重要互相體諒、互相扶持，盡力幫個仔。」最後，兩夫妻決定送個仔返蘇格蘭接受治療。為咗老婆同個仔，佢喺最紅嗰陣退出，真係好傷，損失咗好多搵錢機會。
喬寶寶及在蘇格蘭的家人合照。