鄭中基 承認壓力爆煲再酗酒 患抑鬱停工到美國戒酒：我會努力做好丈夫、好爸爸
2024-08-06
藝人 鄭中基 （Ronald）日前在社交平台發帖指，發現經理人何慶湘「工作及道德操守有問題」，於是宣布立即終止與「機動娛樂」合作，同時因個人情緒及健康問題而需要暫時休息，引起外界關心他目前的狀況。
今日（6日） 鄭中基 再發帖文指：「喺搞笑、娛樂大家嘅背後，發現咗有抑鬱症，當時靠食藥控制，然而我再次做咗個錯誤決定，選擇咗飲酒去逃避現實。」他又指，完成目前工作後，會由太太陪同前往美國參加戒酒中心療程：「都50幾歲嘞，我要去諗清楚點樣去面對自己，然後先可以面對大家，我希望返嚟之後可以做一個更好嘅自己。」
鄭中基 再發帖文，承認壓力爆煲，再酗酒兼患抑鬱症：
-
- 鄭中基 與太太余思敏育有一對子女。
-
- 鄭中基2020年開設YouTube頻道「機動電視台RTV」，以貼地搞笑主題影片吸引年輕人，大受網民歡迎。
-
- 鄭中基日前突然指，發現經理人何慶湘「工作及道德操守有問題」，因此與「機動娛樂」立即終止合作。
-
- 早前鄭中基仍在IG限時動態發帖，為「機動電視台RTV」的影片做準備。
-
- 鄭中基太太余思敏早前亦曾在IG限時動態發帖，似乎暗示會有事情發生。
-
- 鄭中基太太余思敏早前在IG發帖。
-
- 鄭中基與何慶湘。
-
- 鄭中基在宣布與「機動娛樂」及經理人何慶湘終止合作後，再於社交平台發帖指，因個人情緒及健康問題，而需要停工休息。
-
- 鄭中基上載聲明，宣布經理人何慶湘已正式離職。
-
- 鄭中基表示，經理人何慶湘已正式離職。
-
- 今日鄭中基再發帖文，承認壓力爆煲，再酗酒兼患抑鬱症，需要停工到美國戒酒。
-
- 鄭中基暫未有解釋與何慶湘（中）不再合作的原因。
-
- 鄭中基與何慶湘。
-
- 鄭中基與何慶湘。
-
- 鄭中基與何慶湘在工作上有不少接觸。
-
- 何慶湘為鄭中基的工作出了不少力。
以下是帖文全文：
—————————————————
大家好。
早前我發咗一個關於我公司同埋我健康嘅聲明，引起咗好多朋友嘅關心亦引起好多嘅猜測。基於公司嘅事情係會如常運作，希望可以好好咁處理再次交代，唔想影響太多人。
今日我想講一下我自己嘅問題。大家平時見到我大癲大肺、拍搞笑戲、開channel拍片、開演唱會，表面上好似無嘢咁。其實咁多年嚟我都仲係一個唔識得面對壓力同埋唔成熟嘅人。仲記得2000年我因為喺飛機醉酒鬧事，引致好多我嘅fans失望，仲有影響到我嘅家人，後來我決心戒咗酒，想要做一個清醒嘅人。之後喺無向公眾交代情況下，我經歷咗一段好短嘅婚姻，呢段婚姻令到我好唔開心，亦好好咁反省過自己嘅問題。
直到我遇到我太太余思敏小姐，係佢令我覺得我要走入另一個人生階段嘅人。我哋一起組織咗一個家庭，有兩個小朋友，喺一件好幸福嘅事。
但當面對壓力、面對工作、面對人嘅時候，原來我自己嘅問題係無徹底解決到，好多嘢我都未能做到好好去溝通，好多嘢我都無處理好，令家人失望。
喺搞笑、娛樂大家嘅背後，係朋友建議下去咗睇醫生，發現咗有抑鬱症，當時靠食藥控制，然而我再次做咁個錯誤決定，選擇咗飲酒去逃避現實，太太都有同我講，我係自己呃自己。壓力終爆煲，用咗呢幾日時間好好反省自己，工作忙唔係藉口，唔識溝通就要去學識溝通，我覺得好對唔住我屋企人，尤其是我太太同仔女，對唔住！ 我會用時間同行動去證明我會努力做好丈夫、爸爸同鄭中基嘅呢個決心。
接下來我要去解決自己同公司嘅問題，我完成手上嘅工作後，太太會陪我去美國參加戒酒中心嘅療程，都50幾歲嘞，我要去諗清楚點樣去面對自己，然後先可以面對大家，我希望返嚟之後可以做一個更好嘅自己。
呢幾日佔用咗大家嘅時間同埋媒體版面，好對唔住，我希望自己嘅問題真係可以自己去解決，多謝。
—————————————————
更多文章：
