【80後媽咪】獲派「寶校」的媽咪
2016-06-16
最近，好深切的體會了
『養兒一百歲，長憂九十九』這句話
哥哥派位，派得超差
其實，我唔係一定要佢讀名校
我心裡面只係想佢讀間正正常常，唔係太差嘅學校
唔一定要一線，二線學校亦無妨
我嘅心態就係，希望佢唔好學壞
入到間校風純樸，派位OK嘅學校，咁我就收貨啦！！！
可惜，今次派位，真的有點差強人意….
這陣子，我真的好像瘋了一樣
整日在跑學校，又上網搵資料
日日夜夜，為咗學校，不眠不休的
我們並沒有任何學位在手
如果最後還是叩門失敗，我們就要硬住頭皮，在政府派位的那所學校讀書了
心情好差
但對住小朋友
我還是要強顏的，歡笑著
自己充滿壓力，真的唔想小朋友同我一樣…..
早兩日
跟朗朗同學嘅媽媽聊天
佢囝囝嘅命運….. 同朗朗都差不多……
大家都被派進了被稱之為「寶校」嘅小學
但那位媽媽卻淡定得多
她告訴我，註冊的那一天
她待在學校大半日，不斷的問職員問題
深層次的了解了這間學校
然後，她發現
學校職員很友善，所有問題都耐心解答
然後又觀察了校內小朋友
雖然，學校都有唔少新移民，但是小朋友都斯斯文文的，乖乖巧巧的…..
同呢位家長傾完之後
我都覺得，橫豎冇得選擇，與其不斷的唔開心落去
不如睇下間學校，硏究下佢係咪真的好似妨間所講嘅咁差！
現在，正努力搜集資料，了解緊學校當中！
不過心情都平伏了很多啦！
雖然唔知，未來呢段日子，我哋能唔能夠叩到學校
但係，同完淡定媽媽傾完偈，真的舒服了很多
在名校讀書，不一定是最好
在「寶校」讀書，亦不一定會是最差
我地嗰個年代，正所謂，好多人都係讀村校啫
現在咪又係一個成功人士，係咪?
只要肯努力，我相信，朗朗佢哋，第時都會有一個好嘅將來啫！
派得唔好嘅媽媽們
大家要加油呀！