移民去或留？│天使媽媽
2022-10-18
移民去或留？
近年
身邊好多朋友仔離開香港
部分人對香港教育存有懷疑
好多人問
點解唔走？點解唔返加拿大？
每次聽到人哋咁問我
不其然有壓力
留香港是不對的嗎？
就好似作為父母
我哋冇提供最好的生活俾仔女
。。。
就此機會
分享一下我的想法
我先不討論
有冇錢？
在港有沒有需要照顧的長者？
回到原點
選擇移民的原因
大部分都係，為仔女好
但有冇諗過，或者問過
佢想唔想先？
係唔係一定好呢？
又或者咁講
對仔女好，但屋企其他人好唔好？
爸媽心情好，仔女先會好
父母感受都要重視
。。。
我家的情況
哥哥明確表示，佢唔想去外國
你怕香港讀書辛苦，他話唔辛苦
睇成績，暫時好似ok嘅
我最最最糾結的
係哥哥的演藝事業
已經成為他生活一部分
一年表演三，四次
基本上大半年
一星期練足六日
有一日假期咁多
哥哥非常享受，亦好落力
知道表演令溫習不足
一有時間就溫書做功課
因為他怕我哋唔開心
見到佢咁堅毅
唔忍心，要拎走佢呢樣
堅持咗11年的興趣
。。。
去到外國，仲有大把機會表演啦
真的嗎？
要經過幾多年
先可以慢慢從後面企上前
承認係虛榮，但都要靠點實力
青春美好的回憶，就係一點一滴累積
。。。
將來係點，冇人預計到
可能哥哥忽然話，不如聽日走啦
但這一刻
尊重哥哥想法
。。。
至於妹妹
年紀尚小，未諗到咁長遠
對於會否移民
持開放態度
有趣的是
對於自己去外國讀書
妹妹堅決唔願意
原因一
當然係唔想離開屋企人啦
原因二
去外國讀書好貴
妹妹冇信心，我哋俾咗咁多錢
會忽然好勤力讀書
拎到好成績，不辜負父母期望
聽到妹妹咁講
唔知好嬲定好笑
我係笑咗嘅，欣賞佢有認真諗過
讀書唔係妹妹強項
加上係女仔
我同意留喺屋企穩陣同安心
等大個啲
再看看她意願
可能忽然開竅
好勤力咁讀書呢
。。。
部分人誤解，去到外國
讀書一定好輕鬆
人人可以大學畢業
作為過來人，不過係好多年前
香港學生，數學成績係會比較標青
但英文程度，要努力追
華人喜歡聚居
加上而家科技發達
外國都可以睇港劇
日日聽住商台，在晴朗的一天出發
要融入主流社會，學好英文
可能比之前 ，十幾廿年前更難
。。。
當然人人不同，並不能一概而論
好多土生土長香港小朋友
講流利英文
嚟咗香港十年的工人姐姐
唔識聽唔識講廣東話
真係要視乎當事人的學習能力
但我相信，有決心，就一定學到
。。。
自從疫情開始
天使媽媽心態已轉變
曾經好有計劃的我
發現世界不似我預期
Plan 咗都沒意思，未必實行到
見步行步，身體健康就好
。。。
兩兄妹15歲 & 13歲
有自己思想
天使家一向最重視
一。仔女開心
二。培養自己興趣
三。努力向目標邁進
希望大家我能夠一直堅持這信念
。。。
面對好朋友一個一個離港
心情難免沉重
靈感一爆發
寫咗呢篇心底話
再一次多謝公公婆婆爺爺嫲嫲
感激感恩他們有遠見
讓我們有選擇
上一代移民
我們決定回流
會唔會為咗下一代
回流再回流？
未知
走？可以好易
但我認為唔易
我是不瀟灑的人
太多嘢顧慮
。。。
家家有本
支持每一位朋友所作的任何決定
常說，當事人都認為ok
旁人何須擔心
祝願每位在外國的朋友仔
身體健康，心想事成
平安喜樂，幸福快樂
。。。
最後送上
2020年，天使家四寶在溫哥華的美好回憶
當時全港停課，過去加拿大避疫
亦有睇下屋同學校，準備回流
如之前所說
計劃趕不上變化
兩年後，我們依舊在香港
希望有機會
快快再去加拿大
享受美景和天氣
。。。
舊相重溫
P5 妹妹 & S1 哥哥
。。。
一年級的表弟表妹
遊客到此一遊
大家食嘢啦
閒遊
出門口玩
附近公園玩
打千秋，飛到好高好高
櫻花樹下
粉色系列
外國小店
後園打波
去到外國最難適應其一
沒有工人姐姐
飯要自己整
碗要自己洗
就算有洗碗碟機
我習慣洗一洗先擺入去
打掃自己做
仲要掃三層，洗五個廁所
所以我封咗一個
禁止使用，洗小一個
另一個大公園
溫哥華好多櫻花樹
剛好碰上盛開之時
兩兄妹都喜歡加拿大
旅行同生活心態不一樣
去玩就個個都鍾意
落地生根，係另一回事
見步行步
跟隨自己步伐
今日唔知聽日事
沒有不安，心感平安，身體健康
邊度都係好地方
。。。
謝謝觀賞
作者：天使媽媽
其他文章：