運動 ｜跑步後食啲咩好？運動後使唔使食大餐？｜註冊營養師 Jim Lau
2022-06-23
防疫限制放寬咗，好多朋友仔都開始出嚟跑返步，有時佢哋都會問究竟食咩嘢好？註冊營養師Jim Lau表示有朋友仔分享因為怕做完 運動 之後食嘢會令體重上升 ，所以就索性唔食嘢，但只要食得聰明嘅話 ，其實做完 運動 之後食咗一餐可以幫助到你recover 架！
長時間帶氧 運動 嘅能量，係由碳水化合物度嚟，所以跑完步之後，其實要適量補充消耗咗碳水化合物，補充番肌肉同埋肝臟入邊嘅肝醣，因為如果肝醣消耗殆盡嘅話，我地體力就會出現瓶頸位嘅問題，所以盡快補充失去嘅糖分嘅話，可以幫助我哋下一次跑步嘅時候更加容易進入狀態。所以跑完步之後最好補充番一啲容易吸收同埋消化嘅碳水化合物！
其次就係蛋白質，雖然唔係肌肉訓練嘅運動，但補充蛋白質都係好好重要㗎！我哋做完運動之後，肌肉會有撕裂同埋損傷嘅情況，足夠嘅蛋白質量，可以幫助我哋肌肉修補，預備下一次嘅訓練。
至於運動飲料，要視乎你 跑步 嘅時間長度同埋習慣：如果 跑步 係90分鐘以內嘅話，其實普通水已經可以足夠補充流失嘅水份，但係做嘅運動多個90分鐘以上嘅話，咁樣就要按情況選擇一啲含有電解質嘅運動飲料，例如寶礦力，去幫助身體補充流失嘅電解質，防止肌肉因為流失過多礦物質會引致出現抽筋、酸軟情況。
文章獲 Jim Lau – 註冊營養師 授權轉載
其他文章：
去濕 餐單｜營養師推介三日去濕餐 幫你抽乾濕氣｜註冊營養師 Jim Lau