【小小豬廚房】化痰止咳又潤肺 - 海星雪梨湯

話說早在四個月前我哋三口子齊齊去南丫島遊玩時，見到同場好多媽媽都買咗啲大澳特產，我當然都唔執輸，又買埋一份啦！

見好多媽媽都買咗一大包嘅海星，仲話對咳好有幫助。見佢哋極力推介，終於我地忍唔住買咗一包，因為小小豬真係好易咳，買定嚟看門口都唔係好過份呀~

其實海星係好有藥用價值，對滋肺養顏、化痰止咳、生津潤燥同埋可以滋養強身呀！

估唔到買咗咁耐，今日呢包海星係為咗我而煲，因為呢排到我喉嚨乾乾地，仲間唔中有啲乾咳，所以就趁今日返爸爸屋企做偽大廚之時，買齊材料煲俾大家飲，等大家都潤一潤。(實情係…..第一次煲唔知係咩味，多啲人飲有咩事上嚟都可以多人分擔下嘛…呵呵呵)

今次我哋就八個人飲用，所以材料就多少少。海星兩隻、雪梨四個、淮山一兩、乾百合兩湯匙、蜜棗四粒、南北杏兩湯匙、果皮兩片及豬肉眼$60~

海星先用熱水浸約五分鐘，然後將海星肚內清洗乾淨，一定要小心啲清洗，所有內臟都一定要清走，如果唔係成煲湯就會勁腥啦~

海星放入加了薑煲汆水~