【停課不停學】趁聖誕 玩比賽 學理財｜呀劍萬帥
2020-12-11
呢個疫情估唔到同一年四季一樣有第四波，唔知拖到幾時，仲會有幾多波，不過生活始終要過，聖誕節都一樣！
在小朋友世界，佢哋唔會諗疫情幾時完，只會諗幾時有得玩，聖誕究竟有冇大餐食，有冇禮物收！其實除咗收禮物，小朋友都可以學習做聖誕老人，送禮物俾佢鍾意的人(自High心想：梗係我啦) 及同學仔。
有人介紹我今個聖誕，投資者及理財教育委員會搞咗個活動，邀請全港幼稚園及小學生來做一個精明聖誕老人，學吓點樣先訂立目標，再實踐大計，細細個開始學吓點理財。
我覺得又幾好喎！一來可以學吓理財，二來可以送禮物俾我(仍然覺得哥哥同芊芊會送俾自己)，雖然留家抗疫，但停課不停學，唔可以俾今個聖誕求其是但過！
呢個比賽活動叫做「我是聖誕老人」理財任務，只要填好網上參加表格，下載連結就可以自己Print出嚟，因為哥哥同芊芊都係小學雞，所以佢哋參加嘅係公開組嘅「理財任務紙」。
佢哋先要訂立送禮物的對像，畫埋份禮物出嚟，然後為咗份禮物要做3個精明行動，如果好似要請我食自助餐，就是諗下點儲錢，比較一下邊間酒店較平，搭咩車去較慳錢等等，最後Scan埋，再影張關於份禮物嘅相，電郵交番去就完成。
原來佢哋兩個打算送禮物俾老師～不過都係好嘅，代表老師平時對佢哋好好。哥哥見老師平日講書咁辛苦，諗住買水同 Energy Bar 俾老師補充體力！於是佢精明行動先去儲少少零用錢，然後去幾間超巿格價，最後揀買三送一先買，盡量慳錢！
不過送禮物唔一定要使好多錢嘅，都可以親手整，妹妹就上Youtube睇片，打算DIY 一支潤唇膏，佢話天氣開始凍，怕老師講得書多咀唇都會爆拆，真係好有愛喎！（點解對我唔係咁嘅？）
大家都可以試下參加，一邊在家抗疫，一邊都陪小朋友學習理財。
活動名稱：「我是聖誕老人」大挑戰
主辦機構：投資者及理財教育委員會
支持機構：教育局
活動詳情: https://www.ifec.org.hk/santachallenge
報名: https://bit.ly/IFECStapplyform
查詢電話：3181 3888
截止日期：2021年1月15日
作者：呀劍萬帥