【玩遊戲學理財】參加「我是聖誕老人」大挑戰 學懂分享兼理財｜小小豬Kinsey

老實說….我都經常俾老公話我唔係一名精明的師奶仔，因為我唔識得講價，又成日性急，想買就走去買東西(咁我又唔係亂買嘢嘅，只係比較少格價或者大特價先去買)，所以要我分享一些理財心得，實在有點汗顏。不過唔緊要，因為有小小豬幫忙做我嘅慳家小助手。

其實都由細細個開始，小小豬都會跟我去買餸，好多時都會幫手計下要俾幾錢，之後到佢大個仔對金錢有概念時，基於佢好鍾意睇圖書，Daddy就透過講解一系列理財有關故事，等佢明白要好好運用金錢之外，仲要學習善用現在擁有嘅資源。小小豬邊睇邊學，咁就慢慢開始明白理財嘅重要。

最近見投委會舉辦咗個「我是聖誕老人」理財挑戰，等小朋友都可以化身成為聖誕老人，為所愛嘅人送上心意之外，又可以學下做理財小達人。趁依家要全天候宅在家中抗疫，所以同小小豬商量過之後就報名參加啦！

一知道要送禮物俾一位所愛嘅人，小小豬二話不說就決定將禮物送俾Daddy。小小豬諗咗好耐，終於都決定DIY禮物，佢話禮物唔一定要花錢去買，心意才是最重要，而且Daddy平日咁用心同佢溫書講故事，佢都要用心做一件事去報答Daddy，所以佢打算整一個DIY聖誕樹。

為咗整一份既有愛心又精明、慳錢嘅禮物，小小豬先喺屋企搵下有冇現成物資，最後搵到一啲紙條同咭紙，但欠缺白膠漿，所以我哋喺附近嘅文具店買。不過小小豬買白膠漿都揀左好耐，因為佢話要「貨比三家」，要用一個合理價格去買。

齊晒所有材料就開工，每日做完功課就捲幾條紙圈圈，之後將啲圈圈用白膠漿貼喺咭紙上，經過一輪努力，終於完成依個立體圈圈聖誕樹。雖然唔可以話好靚，不過小小豬就落足100%心機去整，就係依份心意都夠Daddy感動啦…呵呵呵！

我當然幫佢哋兩父子影張SWEET SWEET相，之後同小小豬一齊填埋有關表格，咁就SEND埋E-MAIL參加「我是聖誕老人」比賽。唔知小小豬依個有創意又慳錢嘅概念可唔可以贏到比賽呢？不過，就算未能拎到獎盃及書券依啲豐富禮物，喺Daddy心目中，小小豬依份聖誕禮物已經係最強啦！

趁依家多咗時間喺屋企，有興趣嘅朋友仔不如都好似小小豬咁發揮創意齊齊參加比賽，等小朋友學識分享愛。除咗小小豬參加嘅小學組理財任務比賽之外，仲有幼稚園組親子填色比賽，想了解更多比賽詳情，可以瀏覽官方網站 →https://www.ifec.org.hk/santachallenge (快啲報名參加，2021年1月15日就截止啦)

報名: https://bit.ly/IFECStapplyform

作者：小小豬Kinsey