【心儀校網】如果自行分配派唔到，趙Sir教你點做│趙榮德

有家長問我，如果子女於十一月二十三日自行分配派唔到位，應該點做？應否四出「叩門」，還是立即搬到心儀校網搏一搏？希望我給她指點迷津。以下為我們傾談的內容，有興趣知道自行分配派位落空應如何打算的家長，宜仔細閱讀：

趙為本人 家為家長

家：我個仔只得10分，自行分配放榜，我都打定輸數，預備幫個仔四出「叩門」。

趙：自行分配冇「叩門」呢個機制的，統一派位先至有。

家：既然統一派位有，點解自行分配會冇？

趙：因為自行分配放榜時，所有學位分配全在教育局手中，校長手上冇位，家長就算出盡法寶，校長也「愛莫能助」，因為佢手上一個學位都冇。

家：咁我可以出去直資小學搵個學位俾個仔？

趙：可以，今年比較多人成家人移民，不少直資會有學位，但直資要交學費，而且好的直資你未必有學位，有學位嘅又未必好。你想俾個仔讀一間普通質素嘅直資，還是高質素嘅官津？

家：我寧願個仔讀高質素又唔使交學費嘅官津了。但喺自行分配派唔到位之後，點樣替個仔搵個高質素嘅官津學位，唔通要好似古代「孟母」咁，成家搬去名校網？

趙：冇同年紀大嘅父母一齊住的家庭，搬起來冇咁麻煩，你可以喺心儀校網，買或者租一個單位來住，你有冇心儀小學？

家：我住香港，想幫個仔搵一間官津可以直升中學嘅名小學！

趙：我研究過，香港「中西區」、「灣仔」、「東區」及「南區」，比較多官津可以直升上中學嘅名小學喺12校網嘅「灣仔」，因為灣仔區有一間啱男仔讀嘅傳統名校名叫聖若瑟小學，兩間男女都可以讀嘅官立小學，一為軒尼詩道官立小學，一為軒尼詩道官立小學（銅鑼灣），三間小學都有直升嘅名中學，聖若瑟小學畢業生大有機會升上聖若瑟書院，而軒尼詩道官小的畢業生，則有機會升上皇仁書院，女仔可以有機會升上庇理羅士女子中學，全都是常受觀迎嘅中學。

家：搬去12校網被抽中機會大嗎？

趙：去年聖若瑟統一派位有70個名額，兩間軒小每間大約有54個，都唔算少㗎！

家：咁搬咗屋後點通知教育局？

趙：你最好於2021年1月左右搬，然後於1月中到九龍官塘偉業街223號宏利金融中心2樓2室，教育局學位分配組遞交申請，因一月三十日便開始統一派位了。

家：要寫信申請嗎？

趙：要！還要帶有關證明文件，例如租約、差餉單、水/電/煤氣/住宅電話收費單的正本及影印本等。

家：做足以上各項便有機會給兒子抽到個好學位？

趙：係！但最重要係運氣！祝你同個仔時來運到！

家：多謝趙Sir提供咁多有用資料同寶貴意見！

作者：趙榮德

其他文章：

【幼稚園入學】應揀「以兒童為中心」，還是「以教師為中心」的幼稚園？│趙榮德

【英語重要性】讀「免費」幼稚園點樣可以考到直資私小？│趙榮德