【懷孕期間】兩度流啡出血（下）（28-29 weeks）︳80後新手飛行媽媽
2020-10-14
29W0D
出院後，不到24小時，再次流啡，入院求診再到醫院急診室
分流後，好快有醫生接見、問症、照超聲波，BB有心跳，無生命危險，但要留院觀察，然後到產房檢查，核對資料、問症、磅重、check BB心跳。姑娘整理好文件，又再到普通病房，辦理入院手續，展開5日4夜嘅住院觀察。
5日4夜留院觀察 Day 1
當時已經係晚上8點多，已經過咗探病時間，去到病房門口，姑娘唔比胡生同媽咪入，只有我一個辦理入院手續。事隔一日，病房牀位已經爆滿，病牀加到出走廊，上到病房未有牀位，要等上手孕媽媽出咗院，姐姐執好牀先安排到俾我。姑娘叫我先驗小便，我換好衫就出去搵胡生同媽咪，胡生買咗乾糧同水俾我，因為醫生要檢查，我好快就返入去，胡生同媽咪就離開。
今次入院，開咗兩次鴨咀鉗check宮頸，第二次仲帶血，黏咗喺鉗到，超級痛，然後照超聲波、check宮頸長度胎水、心跳、臍帶、胎盤位置一切正常，又係不明原因流血，醫生話因爲第二次出血 驚BB早產，有機會打強肺針，不過觀察下咩情況先再決定 Day 2 每日6點姑娘都會準時開燈，幫全部孕媽媽量血壓同聽BB心跳 8點派早餐，8點半醫生巡房。
食完早餐，左下腹突然好似上次咁，有少少經痛感覺，一郁就痛，但醫生話係啲韌帶扯住，唔需要擔心，之後姑娘駁胎心機聽BB心跳，駁咗一個鐘，駁駁下我都瞓著咗。
醫院餐雖然健康，但唔好食，我每次只會食晒啲菜、少量肉同少量飯，生果就留返tea time食。
全日卧牀休息，但keep住流啡，為安全起見，醫生都唔俾我出院，至於夜晚，瞓得超差，keep住有媽媽作動、叫、推入產房。姑娘不斷出出入入，就算帶咗ear plugs都聽到聲。
Day 3
9點幾醫生巡房，我又keep住留啡 都知道無得走，只有卧牀休息。今餐嘅lunch較豐富，粟米肉片、蕃薯糖水。
lunch過後，玩玩下電話，姑娘通知我，可以上私家病房啦。
私家房環境好好多，靜啲、舒適啲。
連啲飯餸都好味啲，超吸引。
宵夜一包梳打餅 + 一包脫脂奶，但因為我唔飲奶，姐姐比多包餅我。
上到私家房，兩個人一間房，夜晚瞓得好好，同房已生產媽媽雖然要起身泵奶，有少少聲，但帶咗ear plugs後都無阻我瞓覺。我仲瞓到兩邊ear plugs都甩晒，哈哈哈。
Day 4
私家房嘅精美早餐
9點醫生巡房，我已經連續12小時無再流啡流血。醫生問我想唔想出院，但我住到唔想走，俾胡生話啋。如果我仲住喺普通病房的話，一定會揀出院，但上咗私家房我寧願睇定啲先，免得出院後又再流啡流血入過院。
另外，醫生建議我38週入院催生，因為29週兩次不明原因流啡出血，其實唔正常，有機會係胎盤邊出血，驚胎盤脫落，影響胎盤功能 BB會因為咁而缺氧，影響所有器官，但我超唔想催生，然後顧問醫生再巡房，佢話雖然搵唔到流啡流血嘅原因係件好事，但出現依啲情況都唔正常，可能係胎盤邊出血，但檢查時check唔到，所以建議催生。不過依家言之尚早，距離38週仲有一段時間，可以再睇定啲先，住院咁耐，都無抽過血，醫生又安排我抽血 10點幾抽完，3點幾有result，話我血色素低，就開咗鐵丸我食，姑娘亦keep check住我嘅血壓同聽BB心跳 lunch，兩餸兩菜一湯一生果。
3點仲有下午茶
又有餐單俾你揀，完全係JCL service
6點幾已經派晚飯
住院期間不斷食食食，但我嘅磅數反而輕咗，可能醫院餐較清淡，每餐又食到飽飽，無時間食其他零食，而我嘅情況已經穩定落嚟，無再流啡流血 全日卧床休息，預計第二日出得院。
Day 5
7點姑娘量血壓，聽BB心跳 8點食早餐。
9點醫生巡房，再一次叫我38週返醫院催生，但我真係超級唔想，始終想BB順其自然地出世，若果我無見紅、穿水、陣痛嘅情況下，要我催生，真係絕對唔想。
連續24小時無流啡出血，可以出院，食埋lunch、tea、dinner先走，最後一日嘅lunch仲有檸檬撻，超好味。
胡生放工後過嚟接我出院，而同我同房嘅媽媽都出得院，仲同佢交換咗contact keep in touch。
住咗醫院一星期，雙腿竟然去咗水腫，腳趾、腳眼都出返晒嚟 都唔知入院係好事定壞事。
另外喜歡玩Facebook嘅你哋，可以Follow facebook專頁 飛行媽媽雜貨代購團
想追蹤更多胡小姐及愛犬咖哩的生活日常
歡迎like & follow, 亦歡迎產品試用或合作
作者：80後新手飛行媽媽
其他文章﹕