【英國中學雜談】政府中學state school vs 文法中學grammar school vs 私立中學 independent school｜JC in UK
2020-07-23
大仔下一個學年就要揀中學
英國嘅中學大致上分為3類， 政府中學state school ，文法中學grammar school ，私立中學 independent school
政府中學
政府開辦，只要合法居英就可以免費入讀
由小學升中學，只以居住地址為申請條件，catchment area 是計學校和住址的直線距離
不用面試，考試
住得愈近該中學，入讀機會愈大
所以英國人一樣會為好學校搬屋，
好學校附近的住宅一向特別貴
邊間學校好， 邊間學校唔好，要自己用心做吓功課
雖然網上會好容易搵到學校嘅ofsted report
不過總括來說， 只分為outstanding， good， need improve
咁need improve 正常都唔會考慮啦
但大部分學校都係good，咁點揀好呢？
最好，都係問吓當地人
多得facebook，
好多英國城巿都有開facebook group， 有啲仲有媽媽group
入去group 到問吓人，邊間學校好啲，有咩長處，有咩缺點，可以更快有一手資料
之前都有提過，初到英國，先租屋比一到埗就買屋比較好
其中一個原因，係你都唔知仔女讀邊間學校比較好
租屋有比較有彈性
住落一排，知道想住邊個校網就搬過去
否則你買咗間屋，但發現原來間學校不是心儀目標，賣屋再買屋，隨時搞你一年
當然啦，你有無限金錢，可以立即再買又唔同講法啦
文法中學
是政府學校的一種，不過year 6 的小學生可以去參加一個叫11＋的考試，考得好，而又住得近該文法中學就可以入讀
不過，唔係每個城巿都有grammar school
有心讀grammar school 就要事前做多啲準備工夫
私立中學
英國嘅教育出晒名，私立學校真係多如繁星
私立學校之中，通常都係有小學部和中學部
而且除了有分男校，女校，男女校之外
仲有分day school 只提供日校課程，沒有寄宿
full boarding school， 全校都是寄宿生
day ／ boarding school， 一部分學生寄宿，一部分日校生
如果係全家移民，我自己就覺得，讀私立學校都唔好揀有寄宿的
因為學校有寄宿，即代表啲小朋友本身唔喺英國讀，
至少大部分係外地生
咁邊個國家最多？？
反而day school 因為放學就回家，咁佢哋肯定全家喺英國住啦
移民得嚟英國， 梗係想佢融入英國社會，自細同啲英國小朋友一齊玩大啦
唔通想佢日日群番啲華人咩
講番私立學費
講真，相比起香港啲國際學校，呢邊啲私立都唔算好貴了
普普通通的私立day school 中學，大約一萬鎊一年，即約十萬港幣上下
貴族學校梗唔止呢個價，不過呢啲唔係我哋呢啲普通人可以去讀啦
文章授權：JC in UK