【抗疫生活】talk媽媽 - 長期保持社交距離的小孩︳米豬媽媽

由一月尾到而家，足足過咗3個幾月，為咗保持社交距離，我哋都甚少出街，米豬更加除咗返婆婆度（感謝舅父仔專車接送）之外冇離開過間屋成3個月，連朋友仔都冇見面，每日只係對住我同爸爸，彷彿已經忘記咗點樣同其他人相處同溝通。

4月尾疫情開始緩和，我哋就近近地，由去附近散步開始，慢慢帶米豬走返入社會，見返多啲人，不過一落樓下已經feel到奶嘢…….. 以前會同看更叔叔雞啄唔斷嘅米豬，連叔叔同佢講早晨都唔應人，仲匿埋响我後面…. 好似好驚人哋同佢講嘢，見到佢咁….

由於附近嘅公園全部圍封，只可以去海邊散步，睇吓船、睇吓車、睇吓狗仔，但好快就發現，米豬嘅步伐比平時慢咗好多，可能太耐冇著住鞋行咁遠啦。我哋穿過天橋，要落返地面時，佢竟然連樓梯都唔記得點落…. 平時1分鐘都唔駛就落完嘅樓梯，要逐級逐級落，行咗足足4分鐘先落到地面，嗰一吓話唔心悒就呃你啦… 困到樓梯都唔記得點落喎….

有時會諗，係咪我哋過份保護，令到米豬又變返怕生保，怕同父母以外嘅人交流，甚至連去公園玩，爬高爬低都已經唔記得晒？結果响健康同社交之間，我哋依然選擇咗健康，因為只要有健康嘅身體，我哋先可以繼續行再遠嘅路。

4月頭，爸爸考到車牌，決定5月頭幾日long weekend租車帶我地周圍去玩吓，第一日返婆婆度，同屁屁表妹開生日會，豆沙表妹同喬喬表弟都嚟咗，仲有婆婆個朋友帶埋個孫女嚟一齊玩，响走廊行緊返去時米豬仲好興奮，跑去拍門，點知一入到屋，見到多咗好多陌生面孔之後，入屋消完毒洗完手之後，米豬就匿咗入房，死都唔肯出嚟，仲話「要social distance吖嘛!」 過咗一陣，再引吓佢出廳，佢話「你哋咁多人咁大聲我好驚呀!! 我响度睇鐵鐵得㗎喇! 我唔駛出去㗎!」 又匿返入去……… 結果婆婆個朋友走咗，再經舅父仔一輪誘惑，喬喬表弟多次邀請後，佢終於肯出返廳玩，但講緊已經係過咗個半鐘後嘅事….. 我哋走時特登入咗一轉西貢買海鮮，米豬個口係機關鎗咁冇停過， 一係不停食一係不停講，同响婆婆屋企時判若兩人。