【小小豬廚房】果皮清蒸鮑魚仔

元旦日難得一家人齊齊返屋企食飯，緊係要食好啲…食豪啲，所以今日其中一個餸就係果皮清蒸鮑魚仔。其實依家啲鮑魚仔比之前買都真係平咗好多，大大粒都係$100一斤，有啲細粒啲都只係$80，所以都真係幾抵呀！

買齊材料就可以開工啦！

1.果皮浸透去囊，然後切絲。

2.薑切絲備用，葱及芫茜就切碎，最好有咁碎時得咁碎

3.先將鮑魚去內臟再用牙刷清洗乾淨（呢個工序可以話係最辛苦因為每一隻都要擦擦擦，擦的乾乾淨淨先得。記得連埋個殼都要洗，因為洗乾淨之後，放返粒鮑魚落去一齊蒸）

4.將啲鮑魚肉放返入殼之後，就可以將果皮及薑絲放上鮑魚面上

5.待水滾下蒸鍋隔水蒸五至八分鐘（視乎鮑魚嘅大小）

6.另一邊就開始煮個熟豉油，先用油爆香啲芫茜及葱碎，之後加蒸魚豉油煮滾

7.待蒸好鮑魚仔，再倒入熟豉油

8.一碟好味嘅果皮清蒸鮑魚仔就出爐喇

啲鮑魚勁鮮甜嫩口，啖啖肉之外再加上埋個熟豉油，真係絕配呀！簡簡單單嘅煮法就可以煮到一碟大家都讚好味嘅餸，又可以等我扮下大廚啦，真係好有自豪感呀！

作者：小小豬的成長日誌