【趙榮德】「孖仔」或「龍鳳胎」選小學策略
2019-05-03
近日，有家長和我談起怎樣和孖仔或龍鳳胎選小學的問題。以下是我和家長的對話：
趙為本人 家為家長
家：趙Sir，如果家有孖仔，性格相同，喜好一樣，是否應把他們送進同一間學校？如果是，孖仔若在同一班，會否有競爭壓力？
趙：問得好，若然放孖仔在同一班，當然有競爭，這是一般人嘅想法，但實際上唔會發生。
家：點解唔會？
趙：因為有經驗嘅小學知道把孖仔編在同一班上課會非常麻煩，因為孖仔個樣完全一樣，佢哋喺班內調轉來坐，在課室走出走入都唔知果個大孖，還是細孖，所以，家長唔使擔心會編同一班，我在學校教咗咁多年，至少有三、四對孖仔在我學校就讀，從未試過同一班的，所以家長可以放心。
家：明白，如果孖仔性格不同，一個文靜、一個活潑；是否應該送他們進兩間不同取向學校？
趙：如果孖仔性格不同，亦不需要送進兩間不同取向學校，因為香港家長只把學校分兩類，一為催谷型，一為Happy School型，即你是否把文靜果個送去催谷型，活潑果個送去Happy School型呢？萬一文靜果個不能被催谷你豈非累咗佢六年了。所以我寧願送對孖仔進一間辦得好的而目標是均衡發展的小學。
家：點解呢種學校係好啲？
趙：辦得好的小學老師一定對小朋友有同理心，而且一級有四五班，班班老師性格不同，有些平易近人、有些嚴謹小心、有些幽默風趣、有些實事求是，無論孖仔入了邊班，都可以適應。
家：又喺喎。咁如果是龍鳳胎又如何，應該送佢哋讀男女校，還是一個讀男校、一個讀女校？
趙：潮流興讀男女校，而且，自2000年開始，香港似乎不再有「齋校」；如果男女校是辦得不錯的，我會替龍鳳胎選男女校，一來將來升上中學會有更多選擇，二來對子女的接送，更加方便。
家：如果他們被編同一班，會否有壓力？
趙：只要爸爸媽媽平時對子女一視同仁，用公平、公正、公開態度對待子女，他們便不會太緊張自己的表現，就算弟弟成績比姐姐好，姐姐只會欣賞而不會妒忌對方了。
家：同意，爸爸媽媽對子女的態度，決定兄弟姐妹間的態度，多謝趙Sir的提點！
作者：趙榮德
其他文章：