【趙榮德】姊弟選幼稚園或小學的策略

香港家庭盛行「兩個夠晒數」，而兩個多為一個男、一個女，如果兩人智力不同，興趣又有異，在甄選幼稚園或小學的時間，是否要「共同進退」？還是「一個還一個」咁選校呢？以下分別與兩個家長討論選校的策略，先談選「幼稚園」。

趙為本人   家為「幼稚園家長」

家：有兩個子女，女兒是大的，正在一間程度一般，教學又麻麻的幼稚園就讀；今年個細仔考咗五間幼稚園，包括大女嗰間，而家大女嗰間及一間出名幼稚園收咗佢。我想問：我應該替個仔揀姊姊嗰間？還是揀出名嗰間幼稚園？姊姊嗰間優點係近屋企，姊姊喺度讀我容易照顧，一次過可以照顧到兩姊弟返學同放學。但缺點係間幼稚程度一般。恐怕將來升讀名小學不易。揀出名嗰間幼稚園啱啱相反，優點係程度高，容易考入名直資小學，個細仔反應好，吸收能力高，讀姊姊間幼稚園會覺得悶；但缺點係距離學校遠，要佳校車，對我來講返學放學都無咁方便。兩間都有優點同缺點，我唔知點樣作決定。趙Sir，想請教你專業意見。

趙：根據你的描述，弟弟吸收能高和反應好，適宜於讀名幼稚園，如果從子女角度看，兒子在名幼會如魚得水，讀得開心，在姊姊嗰間，就會覺得淺，會悶悶不樂；但從你嘅角度看，似乎把細仔放入姊姊嗰間幼稚園會容易照顧些，唔使四圍撲。我認為揀學校應該從子女角度看，讓兒子讀符合佢性格同程度嘅幼稚園，咁樣，兒子才讀得開心。至於接送返學放學，可以用校車或與其他家長商量一些互相幫助方法來解決接送。重點是：一個還一個，千萬不要為了遷就一個而犠牲另一個。