【MimiJw n SY】出玫瑰疹的日與夜

心怡出世後大概發過4-5次燒，唔知關唔關喺我個肚入面發過燒嘅原因，佢次次一發現有燒就好快咁會標到38.7~9度，而且仲會維持起碼3幾日。最可怕的係今年元旦嗰次，反覆燒咗7日。今次打破咗以往發燒紀錄，最高燒時有41. 2度。每次發燒醫生都會話有出玫瑰疹機會，因為始終未出過，而且5歲以下出玫瑰疹機會都大，發燒反應也相對大。要觀察小朋友情況會唔會有咩變化。 因為未有經驗，對於呢個咁靚嘅疹名，都好好奇! 上網搵下相關資料，預早了解個病徵同照顧方法。

而網上搵到嘅資訊同今次心怡發病期間有好多相同徵狀，以今次嘅經驗，我總結/節錄咗部分：

• 出疹前(發燒前)係有高度傳染性嘅 (但因為唔會有發病前的任何病徵，所以好難提防或察覺已中招)；
• 高燒最少72小時(藥效過咗又燒過，好反覆，甚至藥力只可維持低燒一陣)；
• 期間小朋友可能出現喉痛，胃口欠佳(心怡連最愛嘅蜜糖水都唔飲)，精神狀態完全正常(活躍的)，情緒會比較燥底(可能準備發疹前皮膚有唔舒服感覺)，醒瞓，輕瀉肚痾，容易脫水(因為心怡唔太肯飲水，嘴唇好乾)；
• 留意手腳溫度而配合著衫，心怡有2日燒到成40度，但係手腳冰冷，開頭都唔知要加衫定減衫，後來婆婆話呢種叫「內燒」，係要再高燒幾日嘅徵兆，手腳凍係發緊冷，應該要加衫保暖先，等暖番先再抹身降溫。果然係咁，手腳暖番後，發燒溫度都穩定番；
• 退燒後身體出現密麻紅點疹(疹量最多嘅時候，摸落去似起雞皮少少突起)；
• 個人會攰D，不過心怡想瞓又唔肯瞓，呢個時間係最扭計，扭到人都癲!!!!!!!
• 沖涼D水唔好太熱，我無落沐浴露，擔心令皮膚更乾；
• 聽老人家講分別用過金銀花同芫茜煲水浸浴；
• 著番棉質柔軟透氣衫，如果出汗要及時抹乾；
• 退燒後雖然出疹但胃口非常好；
• 玫瑰疹應該唔痕唔痛(見心怡無R佢，幫仍搽藥膏時，佢無縮無扭擰，佢自己摸住肚皮D疹都仲識笑)；
• 出疹第3日晚已經退左9成；
• 出疹後個傳染性已經好低，但都唔好番學住 (心怡成個星期無得番學，連第1個X’MAS PARTY都參加唔到了)；
• 玫瑰疹唔會復發，出過1次之後終身免疫；
• 知道出疹之後要通知之前曾經接觸過嘅小朋友，等屋企人可以留意住；