【天使媽媽】要學。想學。唔學

早幾日，我同Tobia Artemis講
我地升上小學了，試過好多不同的興趣班
而家揀定左嫁啦！
暫時唔考慮再學其他野
要好好努力學習，知道嗎？

***

Tobia 8歲，Artemis 6歲
呢八年來，花在興趣班的錢。。。
真係唔敢計

興趣班學野，肯定貴過學費

升上小學，冇咁多時間學咁多野
可能有興趣有天份的，之前已經試過
暫時冇意，冇時間，亦冇錢再為佢地發掘新興趣

經過呢八年的學野生涯
有咩班可以留低，有咩班係倒左d錢落海？
天使媽媽同大家談談「興趣班」

***

興趣班，以我個人理解，係學校以外的班
唔一定係有興趣先學，好多小朋友，唔想學都要學

Tobia 半歲時，已經返興趣班
不外乎係做Gym，認字
認 dot dot咭 <—認到有咩用？我竟然買左成套

Artemis大個d，一歲左右先返興趣班
當時要湊Tobia，比較忙了

學前興趣班，媽媽的心態，通常都係
你報我又報，不求回報，只恨去下街
小朋友接觸下同伴，媽媽見到好朋友，傾下謁，交流下
已經係好多年前的事，相信而家的bb市場同我當年有d唔同
我唔多講了，講完都唔 update，哈哈哈

我贊成小bb出下去學野，因為一定要家長陪
會有優質親子時間，媽媽唔會玩住手機上堂
大家都開心

***

入正題
興趣班，分為「學術」同「非學術」

先講「學術」，主要有中，英，數
英文又可以細分，會話，文法，作文
總之你想學乜就有乜，多到報完讀完都唔知教左乜

「學術興趣班」，正常小朋友都唔想學
但又迫住要學，因為程度唔夠，要加強一下

***

「要學」

Tobia K1開始返英文班，全家冇人講英文
想佢聽下英文，重點培訓聽力同會話
McMug太都話，西人教英文，好吸引

Artemis跟哥哥，K1開始返一樣的英文班
佢爆喊左兩年，比錢果位，即係我，頂唔順
雖則話入到班房唔喊，但學習成果都唔會好
K3停左一年，P1再學，忽然唔再喊

***

Tobia P1開始學普通話，全家冇人識普通話
我以為自己識去台灣叫野食就係識，原來唔係
2x年前跟郭富城對你愛不完學的國語，明顯不入流
唯有請老師教，由拼音開始，打好底子

Artemis跟哥哥，P1「要學」普通話

***

Tobia 幼稚園時期上過數學速算班
上到小學，發覺係冇用的
學校要step by step寫出來
倒錢落海。。。

Artemis梗係唔會學數學速算班
睇阿哥頭，知道小學中文最深
K3時返中文認字班
識多左字，小學用得返，讚！

***

課後功課班，學科輔導班，文法加強班
如果小朋友有需要，贊成花多小小時間上呢類興趣班
不想成績太落後，自己教唔聽，又怕影響親子關係
出去比人教吧

小朋友吸收能力有差異，可能要聽多幾次先明
比多d時間，唔識學到識
但我不贊成報讀「操卷班」，實在太辛苦了

***

「想學」

Tobia曾經上過，正在上的興趣班
畫畫，N班的暑期班，每次都喊
合唱團，3歲開始唱到而家
游水，P1學識自由式，P2學識蛙式，P3冇時間學
溜冰，K3學，學左三年，撞左時間，放棄了
圍棋，P1學過，停左一排，P2再學
籃球，P2開始學
彈琴，P1正式學

畫畫同合唱團，係我幫佢揀
其他全是跟他意願的

***

Artemis曾經上過，正在上的興趣班
畫畫，K2開始學
合唱團，3歲唱，喊左一年三個月，停！
游水，K2學，學唔識
溜冰，K1學，學到而家
芭蕾舞，K2好恨學，學左十堂話唔
圍棋，P1學
彈琴，K3學

淨係合唱圍係我幫佢揀，其他全是她意願

芭蕾舞，中伏，買哂衫同鞋
一向對芭蕾舞冇幻想，冇計劃比個女學
Artemis試過後，知道唔適合自己
都好丫！總算試過！

***

天使媽媽唔認為，冷門的興趣班，會提升入名校的機會
除非真係學到好top，但我呢d hea人，冇可能會咁勤力培養對仔女
所以 Tobia Artemis「想學」的，都係好普通的興趣班

失敗的過案唔多，就算喊，我都要堅持一段時間先停

經過多年研究分析，因應兩兄妹的喜好和天資
天使家的興趣班，定下來了

學術：普通話 & 英文
運動：Tobia籃球，Artemis溜冰
藝術：Tobia 合唱團，Artemis畫畫
音樂：兩個一齊學琴
耐性：兩個一齊學圍棋
自理：兩個一齊做童軍

有動有靜，有得學，有得玩，乜都有d
培養到佢地有多方面興趣，又返得開心，堅持到
呢一刻，算成功的！

***

「唔」學

我算民主，唔會迫佢地學一d超唔想學的班
但有某d興趣班，我真係接受唔到，肯定唔會比佢地學

「唔」小提琴的原因
我依稀記得，+2細過時拉小提琴的美妙音韻
每年換琴，成本太高

「唔」足球的原因
我唔能夠在足球場邊，默默地等
冬凍夏熱，大風吹，太陽曬

「唔」朗誦班的原因
始乎只為比賽而報讀
冇乜人閒時會約朋友，一齊「朗誦」吧？
在屋企開心時「朗誦」的人，都好似唔多

「唔」面試班的原因
目的只有一個，考到間好學校
讀左，有希望，有幻想
但讀左，未必收，冇得退款嫁喎

***

以上「要學」，「想學」，「唔」的觀點
只是天使媽媽的個人見解
每位小朋友不同，只要大人小朋友開心
就返咩興趣班都冇乜所謂
願人人都有課餘時間充實自己

***

以下呢四樣，男仔記得要學識
游水，踩單車，溜冰，打籃球
咁先有得玩嘛

女仔唔識唔緊要，識到個男仔拖住就得啦！哈哈哈

***

最後，送上興趣班的回憶

***

Tobia返左5年的合唱團，估唔到佢咁鐘意
每年有兩次表演
2013年7月，合唱組制服

2014年7月，調到音樂劇組，表演服不一樣

得到老師厚愛，Tic Tac 男企正台中間
有點緊張，面無表情，好彩係綵排咋

***

每年的音樂劇，由小小小角色開始
2012年，小魚仙的水草

2013年，小魚仙的水母

2014年，美女與野獸的地毯

2015年，醜小鴨的鴨仔

音樂劇組，比合唱組要花更多時間排練
Tobia說好鐘意，希望一直讀上去
唔影響學業的話，你喜歡就好
期待你下次表演，有更好的表現

***

Artemis的畫畫興趣班小回憶

鐘意做手工

我最愛的中國畫

喜歡自由創作的畫室

Artemis 可以座定，畫畫好比心機，亦好多元化

***

閒時會在家中齊齊做勞作

靚靚花花頭飾

是Artemis的自信作

你喜歡嗎？  (^^)

作者：天使媽媽