【小小豬廚房】鹽焗蟹

上次去食海鮮餐時，嗰一碟鹽焗蟹真係幾令人回味。行經街市，見到啲好大隻嘅羔蟹，所以就心思思咁買隻返屋企試下啦！

簡單幾樣材料就整到啦。

首先要將蟹洗淨先，小小豬自告奮勇幫我洗蟹，俾隻蟹包住隻手都唔驚，仲笑到咔咔聲，真係冇佢咁好氣呀！

洗完之後，將蟹放入雪櫃冰大約30分鐘，一嚟等隻蟹進入昏迷狀態蟹，二嚟又可以等啲蟹肉實啲，一陣蒸出嚟好味啲！

預備一張錫紙，放上大量粗鹽及少少黑胡椒粒。

把蟹放上，再加入粗鹽把蟹蓋著，把錫紙包好。

原本係可以用隔水蒸方法嚟焗蟹，不過今次就試下用電蒸爐，貪佢簡單啲又方便(唔洗睇火)嘛。我用電蒸爐焗蟹30分鐘(如果係隔水蒸方法我估時間就應該少啲，當然睇下蟹仔有幾大隻啦)。

打開電蒸爐蓋都嗅到蟹味，就即係可以食得啦。

掃走蟹身上嘅鹽，食得啦！

嘩…隻蟹真係勁多羔，YUMMY！

哈哈哈…一隻大個小小豬手掌嘅蟹，唔洗幾分鐘就俾我一個人KO晒個身同蟹蓋(老公負責食蟹腳)，真係勁滋味呀！

作者：小小豬的成長日誌

即Like Oh!爸媽Facebook，登記成為Oh!爸媽會員，緊貼第一手親子資訊。