【綿綿媽媽】回顧瑪嘉烈：半全餐生B記
2018-07-12
懷孕第40W+3D，綿綿終於出世喇！趁現在還有記憶，我要將整個過程回顧記錄下來。
如果媽媽有任何作動要入院，瑪嘉烈醫院首先會安排媽媽到產房觀察一段時間，例如聽BB心跳、量血壓、check 宮頸等等，再無動靜先能安排上產前病房待產。產前病房可以開電話及上網，而產房入面就唔可以，如果怕悶，可以帶定書仔去睇，不過會經常聽到隔離有媽媽大叫及生B 嘅聲音，其實聽到會覺得好驚好緊張，如果要用電話通知屋企人，可以問姑娘借。另外探訪時間係12:00pm – 1:00pm、5:30pm-7:30pm，每次最多只限2個人。不過產前病房可以轉人，而產房就唔可以，所以如果係產房待產都要有心理準備。
之前試過一次見紅(4月12日) ，一次懷疑高位穿水(4月22日) ，分別入過2次醫院，最後都係無動靜住咗一晚就出院。 到第3次陣痛入院， 終於可以等到綿綿出來喇！
雖然我懷孕時期做了好多準備功夫，但原來有好多突發事情係估計唔到的。 本身預計自已可以順產，最後結果都係要開刀。