【hailiah媽媽】放棄母乳，好多時理由只有1個——無奶
2018-06-24
放棄母乳，好多時理由只有一個
-無奶-
其實生完bb大多數產婦會以為自己無奶，因為維持奶量係一個好深嘅既學問，你估人人都係富媽咩？我自己都唔係。
唔識得掌握餵哺母乳，呢個係鐵一般嘅事實，無餵過當然係唔識餵啦，我係一個例子：我維持咗22日就決定停奶，後來兩個月後我再追，追咗5個月全母乳。（想知點追請追返之前文章）
有好多因素令我無奶
1.bb唔識埋身
2.唔識泵奶
3.無時間表俾自己
4.唔識飲上奶嘢
5.加上身心俱疲，根本唔想餵，漸漸你就會搵其他代替品-奶粉嚟幫手
要解決無奶問題，先要對症下藥
1.其實bb埋身係維持奶量最重要嘅方法，身體會因為bb啜幾多就做幾多奶
2.唔識泵奶係因為揀唔啱尺寸嘅喇叭，唔啱尺寸泵岀嚟嘅奶量都會唔同
3.飲炒米茶外，仲要飲大量湯水同水嫁
4.其實產婦最重要休息，其他洗奶樽呀嗰啲留番俾屋企人做啦。如果唔休息心情唔好奶量係會跌，咁你又不停補奶粉，身體就會做少奶以為bb夠奶，咁你不停補就不停少，要餵奶就預咗要追奶。要追奶就要勤力泵奶/埋身，例如: 初生bb大概每兩小時食奶，bb瞓咗唔起身，咁你就要泵奶，因為身體會有記憶記得佢咩時間食奶你都會開始漏奶/谷奶，因為提你要餵奶啦。
人嘅身體係好奇妙，所以點解話母乳係最適合人類，母乳成分係為你bb而訂造營養及抗體，而唔係奶粉罐上面一式一樣嘅營養標籤。
以上係個人心得，就算係邊一種餵哺都係一種愛，盡最大嘅努力就已足夠(我也是奶粉長大下的)。
其他文章：