【綿綿媽媽】最後預備~第36-39週的懷孕生活
2018-05-03
臨生前,好似有好多顧慮,包括手頭上工作及瑣碎事務,腦海經常出現仲有邊樣事情未辦好,邊樣東西未預備好,有邊樣嘢好想做但又未做 ~ 等等!唔通大肚媽媽真係會有咁樣反應??
首先最開心係~ 終於有機會陀住綿綿bb,同”薯條仔”影合照喇,呢日係36W+3D,謝謝綿綿爸爸帶我哋落樓下公園拍照留念,希望將來你哋能夠一齊好好相處及開開心心生活。呢2張相,我很喜歡。
到了37W+3D,暫時係我最後一次到 St.Paul做產檢,當時綿綿已經有2.5kg,生長進度正常,數數日子,呢日距離預產期倒數日子仲有19日,愈諗愈緊張,感覺時間開始過得好快。
雖然在家安胎,但部分化妝job,客人肯來我家,都會照接的,如果外出job,就由其他同事做。不過38W 開始就唔敢接了,怕綿綿隨時出來,所以全部都交由同事處理,呢段日子幸好有同事代接工作,總算可以安心下來。
另外花藝工作方面,臨生綿綿之前,終於安心完成埋手頭上最後呢個訂單。如果大家要再訂花頭飾,最快要等我6月坐完月先可以再交貨及再開班喇!謝謝大家體諒及支持!
想睇多d我哋作品,歡迎到 Suki make-up page 相簿瀏覽
之前與 Babebama合作promotion,幸好係38W前趕起完成織好5對bb鞋仔,謝謝喜歡綿綿媽媽手作既朋友。
因為生完之後會去媽媽屋企坐月,所以要預先安排屋企人將初生bb用品搬到娘家。另外為了方便老公容易搵到我放嘅物資用品位置,例如 Refill 用品、出入院用品等等,已經係38W前貼好晒 lable喇,希望到時順順利利啦。
到38W當日,約5pm及6pm時發現2次見紅,之後打算沖完涼食完晚飯先去醫院,但後來再無見紅,又無陣痛,最後當晚都留番喺屋企休息。 因為第二朝早上要到健康院產檢,唯有到時見醫生時再睇情況。見完醫生,就寫了封信安排我當日返瑪嘉烈醫院檢查,最後都要留院觀察,最初留係產房,觀察了一小時bb心跳及胎動次數,因為係產房,所以不能開電話,探病時間又未到,所以想聯絡屋企人都好唔方便,後來再等見醫生,到了晚上8pm,終於可以送我上產前房休息及觀察,這樣好好多了,因為可以開電話,方便同屋企人聯絡,又可以上網睇電視及隔離左右都有其他媽媽,有番d人氣呀。觀察了一晚暫時未有動靜,醫生安排我第二日食完lunch就出院。可能綿綿未ready咁早出來,又或者知道媽媽緊張,俾機會我預先實習醫院待產環境,只是辛苦了綿綿爸爸兩邊走!現在唯有乖乖留喺屋企休息吧。
臨生前仲有機會俾我拍下綿綿胎動, 快鏡睇好搞笑呀!
現在39W,距離預產期仲有7日,隨時隨地要迎接綿綿來臨,雖然真的很緊張,很怕痛,但我會同自已講,一定要努力加油的!
***不過都係控制唔到,成日想著有甚麼事情未準備好***
綿綿媽媽的足跡
https://www.facebook.com/sukimama2018/
https://www.mamibuy.com.hk/home/13092
https://wow.esdlife.com/sukimama
作者:綿綿媽媽