【許許與小BELLA】BB營養食譜10M+：野菜風味蘑菇豆腐薄餅
2018-04-21
今次做了較大眾化口味嘅BB食譜，「野菜風味蘑菇豆腐薄餅」，約10個月大BB都可以食。其實呢款餅好似我哋大人食嘅薄罉，又似BB食嘅pancake，用好少油已經可以煎得靚，如果唔想用油煎，就要預備一隻平底易潔鑊。
材料：
蘑菇一隻
布包豆腐1/8磚
洋葱數小片
紅蘿蔔一小截
西蘭花一朵
雞蛋一隻（也可以唔用蛋）
麵粉三湯匙
做法：
1.洋葱、西蘭花、去皮紅蘿蔔、去頂蘑菇洗淨，蒸熟或煮熟，切碎備用。
2. 豆腐放碗中壓碎，加入雞蛋拌勻， 再加入三湯匙麵粉（如果無加雞蛋 可以多放半湯匙麵粉）、10ml水/高湯拌勻。
*如果太稀可再加些麵粉，太稠則多加點水，要形成類似芝麻糊狀態。
3.加入野菜及蘑菇拌勻。
4.預熱平底鑊，可放一點油，鑊熱了後調到最細火，倒入麵糊，略轉平底鑊直至麵糊均勻分佈，慢火煎約5分鐘。期間不要移動，直至見到餅邊開始挺身變硬，便可嘗試從邊緣開始鏟起。
*材料預先蒸熟好處就是現在煎餅時毋須太花時間，如果易潔平底鑊靚，甚至不用油也可以。
5. 翻轉另一面以相同方法煎。 完成後可切片享用。
*除了用高湯會較有味，幼兒可放些鹽，或者兩者都不用，直接加入芝士又有另一番風味。
餡料也可按BB喜好自行改變。因為Bella吾鍾意食菜，所以我主要都係加蔬菜類。
作者： 許許與小BELLA
