【綿綿媽媽】瑪嘉烈醫院-產前運動篇

2018-06-12

之前曾經提過醫生寫左轉介信給我排期做 [產前運動]，有助分娩時順產，終於懷著”綿綿”完成3堂喇，現在等我回顧一下先~

23 Dec 2017 （第一堂) 費用$135

當時懷孕22W+3D，呢日綿綿爸爸都有陪我去上堂。第一堂主要教媽媽如何解決腰背痛、抽筋及水腫問題。產前運動可以強化肌肉、幫助分娩、減低產後鬆弛或失禁問題，最後就教如何放鬆嘅方法及技巧。上完第一堂，姑娘都有叫我們keep住每日練習，大約有7個動作，不過我不算太勤力，有時一星期做得2-3次，來緊仲有2個幾月時間，希望keep 到啦～

如果媽媽想改善腰痛或感覺肚子比較重，可以使用托腹帶，我懷孕第4個月已經開始買來用，我當時買 “010 maternity”呢隻牌子嘅全腹型托腹帶，印象中around 5百蚊，剛剛好當時永安百貨做特價。我通常出街時先戴，因為行路會覺得肚子特別重，戴咗可以減輕腰背嘅負擔。市面上有其他牌子，例如六甲村、Gennie’s、Rosemadame等等，但其他牌子我未用過，暫時分享唔到俾大家，媽咪可以因應個人喜好而選擇的。

30 Dec 2017 (第二堂) 費用 $80

當時懷孕 23W+3D，呢日綿綿爸爸照樣有陪我去上堂。第二堂會介紹順產分娩過程和有甚麼方法可以減低痛楚，例如分娩止痛機、分娩球、止痛針、笑氣、無痛分娩等資訊。另外教呼吸控制技巧，分娩時用力方法，呢part 真係好有幫助，因為我覺得呼吸控制技巧原來唔容易。總共分咗4種呼吸方法，有低程度呼吸、中程度呼吸、高程度呼吸，轉接期呼吸，所以我都好勤力練習呢part。最後都有講解產後運動及護理，呢part 就要等生完”綿綿” 先做得喇~

18 Jan 2018 (第三堂) 分娩球運動班 $80

當時懷孕26W+1D，呢堂主要用 Fit Ball 做產前運動，一定要上咗前2堂及懷孕30W以下先可以參加。分娩球運動可以幫助媽媽應付陣痛，減低緊張及壓力，保持輕鬆，因為上完這堂醫院會頒一張證書俾媽媽，證明媽媽已經學識，到醫院待產時就可以借Fit Ball練習來應付陣痛，所以我對呢堂都好感興趣，一邊聽音樂，一邊做運動，覺得好好玩。姑娘都有教授利用Fit Ball做產後運動，到時生完”綿綿”先可以試喇。

*不過我有問其他媽媽，不同醫院都有不同程序，所以各位媽媽如果可以報到產前運動，就盡量報啦，我覺得對媽媽會有幫助~

＿

上完分娩球班，都要keep住返屋企練習，對順產先有幫助，所以綿綿爸爸都陪我去 Decathlon買Fit Ball和yoga墊，價錢都唔貴，我之前係先施見到一個Fit ball 要二百幾蚊，但係Decathlon只賣$64，真係平好多，另外加個 Ball Pump $13，再買埋yoga墊$49，Total 都係$127。所以如果有媽媽需要買Fit Ball，我暫時見到最平應該係Decathlon。