【和牛b】自製玩具：廁紙筒車仔 小朋友都自己做到！
2018-03-14
又係車車系列，今次同大家分享呢個自製玩具，係適合同小朋友一齊做嘅。而且材料仲好簡單，仲係環保嘅自製玩具嚟。今次最重要嘅材料，就係每個人屋企都一定會有嘅「廁紙筒」。
廁紙筒平時用晒就會掉咗佢，其實都幾浪費。而家我哋就利用佢變身成為小朋友嘅玩具啦，做法非常簡單，手殘媽媽都會做得到o架!
材料：
廁紙筒
彩色紙/ 博士貼
漿糊筆/ 雙面膠紙
硬卡紙一小張 (剪出4個圓形做車碌)
做法：
1.首先利用漿糊筆塗滿成張顏色紙/ 利用雙面膠紙貼滿成個廁紙筒或顏色紙上。
2.將顏色紙/博士貼 貼上廁紙筒。
3.利用界刀界出一個長方形，預留一邊作為車嘅椅背墊。
4.貼上/ 畫上裝飾
5. <以下是Optional的步驟>
A.利用螺絲批開四個窿，然後利用兩腳大頭針將車碌固定 (可動款)
B.將四個車碌貼上 (固定款) *如果做固定款，四個圓形咭紙中間就唔需要開窿啦~
＼ 完成啦 /／
今次呢個勞作和牛B都有份整，所以佢特別有成功感，特別開心，仲不停叫「爸爸，你睇下!」佢好想同人分享佢份喜悅。
小貼士：
點解車身（廁紙筒）我會用顏色紙/博士貼貼上去呢?
因為如果利用顏色筆嘅話，一來要塗滿成個筒要好耐時間，二來用錯顏料嘅話就會甩色甩到小朋友成手都係，加上直接將顏色紙貼上去係最方便、快捷。
可動款嘅車碌問題
建議車碌做大少少仲好，同埋車碌嘅咭紙要夠硬夠厚，個人認為好似紙皮盒咁厚就最佳。
————————————————–