【小周董世界】懷第2胎同懷第1胎 心路歷程大不同
2019-09-12
人人都話做媽媽好偉大，但其實未真正懷孕、未經過生產的痛、仲有照顧BB的日夜忙碌，你係唔會明究竟阿媽有幾偉大。當我懷第一胎時，我同大部分媽媽一樣對新生命來臨充滿希望，身邊所有人都會對自己特別緊張，不論家人、朋友、同事知道你初次懷孕都會盡量遷就，老公就更加當你女皇看待，想食乜飲乜都照顧周到，每晚仲會同BB傾偈，多幸福的畫面呢。
當生完第一胎，小周董步入3歲，我哋就開始考慮生第二胎，原因我諗同好多爸爸媽媽一樣，唔係自己特別鍾意小朋友，9成都係為咗第1個小朋友想佢有個伴，將來有兄弟姐妹陪伴，有人同佢玩，有人同佢分擔分享。……好感謝上天賜福，好快我己經懷有第二胎了。
不過我發現懷第二胎同懷第一胎，心路歷程有好大分別，先講身體狀況，醫生話原來好多人第二胎都會比較辛苦，反應亦都會比較大，有可能因為年紀大咗身體差咗，亦有可能係因為身體其實有記憶，再次懷孕喚醒番身體記憶，身體提早有不同的反應出來，好似我咁，第一胎好後期先會抽筋，但我現在懷孕第二胎 5個多月已經開始有抽筋情況，哈~ 但好彩有暖男小周董幫我按摩 hehee
