【慈慧幼苗】被孫女傷透心 老爺：點解你唔同爺爺打招呼？
2017-05-18
「過嚟！點解你唔同爺爺打招呼，咁無禮貌？」
朋友模仿佢老爺嘅咆哮，向我大吐苦水，話老爺噚日向阿女發脾氣，攪到阿女喊咗好耐。
我不禁好奇地問：「阿女做咗啲乜令你老爺發咁大脾氣呀？」
朋友一面無奈：「老爺噚日捉完棋返嚟，又因為阿女掛住睇電視唔理佢，所以咪嬲咗囉！」
我朋友繼續憶述事件經過，並指自己「躺著也中槍」：
「今次老爺仲即刻熄電視，阿女完全無心理準備個電視俾人熄咗，於是爆喊。老爺仲話埋我添，叫我唔好成日俾電視阿女睇。」
我聽完成個故仔後，就知道今次孫女傷透爺爺心，係電視嘅禍害！據朋友所講，平時孫女見到爺爺返嚟，會好主動同爺爺打招呼，但一旦嗰日睇緊電視，就邊個返嚟都唔知，完全睇到入晒神，當佢透明，爺爺先會咁嬲。