【荔枝孖媽】4招幫BB 輕鬆加固的份量同次數

4招幫BB 輕鬆加固

1. 尊重每個BB的差異

對媽媽們而言，BB幾時開始加固好呢？俾BB食D咩好呢？真係一個頗為難的大問題。其實只要根據BB的月齡，提供BB固體食物餵食建議只係一個概括性的標準，並唔係一定要跟足。BB係你嘅，你最清楚佢可以去到邊，食到咩？重要原則係唔好勉強，e.g.接受度較高的BB，可能會比標準快，而且食量亦可以較多。相反較慢的bb，就算月齡已過，但進度同份量都可能比標準慢同少，甚至可能有時會比較反覆同有倒退的現象。

媽媽們應瞭解呢段時期BB成長慢，唔代表將來都係慢。唔好有一種加固係一定要即時做到的心態，亦唔需要因為為份量夠唔夠而焦慮。應以輕鬆的心情，享受同BB溝通一齊分享餵食樂趣。

2. 配合BB加固的時機

一般嚟講，大家都會係BB大概4-5個月，Around 6-7kg時幫BB開始加固。而早產BB可能要到7kg，大約七、八個月以上先開始加固。 我自己呢就係足6個月先俾Caydan Ramsey 開始加固的。

其實到咁上下你自己都可以觀察到BB，如果BB出現對大人食物有興趣，伸出手想拎，嘴仔係咁好似咬嘢咁同埋流口水的現象，呢個就可以係開始加固體食物的訊號啦。

3. 首先俾BB適應用匙餵食

一旦觀察到可開始加固體食物的訊號之後，最初可以先整比奶粉稍微稠的糊仔，先用匙餵一口試下放近BB嘴仔。由於係BB出世之後首次接觸固體食物，所以一般會乖乖接受的機會唔大。大多數BB初次用匙，通常會因為害怕而拒絕。對月齡較小的BB而言(細過4個月)，仲有可能會用舌頭將D嘢食推出的反應，所以會更加無法順利加固物的步驟。 

如果咁嘅情況發生，就唔好強迫BB食，可以隔一日再試。如果都係失敗的話，就可以試間隔多幾日之後再試。只要能夠有耐性咁重複餵俾BB，相信最終BB都係會接受的。係呢個訓練期間，可以比唔同形同埋唔同色的匙當玩具咁俾BB拎下，又可以俾BB試下放入嘴，咁就可以俾BB習慣對匙的接觸。

4. BB初期咀嚼需要多次反覆練習

媽媽們可能都會發現，當將固體食物放近BB嘴仔嗰陣，BB有時會發出好似好開心的聲音。但並唔係次次餵都會順利的，有時見到BB高興的表情，好似應該會食晒咁啦，但係之後BB又會無啦啦拒絕食，又或者將D嘢食由嘴仔吐番出嚟(排出反射extrusion reflex)，有時仲會突然間大哭。有些媽媽可能會強行將D嘢食硬塞入BB嘴仔，最好就唔好咁做，因為BB同大人一樣都係會有情緒唔好或者食慾唔好的時候。所以唔好迫BB一定要喺訓練期間食晒，如果真係唔肯就可以等到下次再嘗試吧。

BB加固的份量同次數

BB 5-6個月大時

加固的份量 :

澱粉質類的食物由一小匙開始，每隔2-3日增加一匙，直至加到半碗為止，可考慮煮成比較稠的粥；蔬菜類就由1小匙，逐步增加到4-5匙；蛋白質類(如魚、肉)就可以由1小匙，增加至3-4匙(蔬菜同蛋白質類都應先用水煮後blend碎)。

加固的次數 :

加固餵食的次數可設定為2次(e.g. 第一個月1次，第二個月改為2次)，相對母乳或者奶粉就可以減為4次。

BB 7-8個月大時

加固的份量  :

澱粉質類食物可以開始改為煮軟的粥，份量可設定為半碗或大半碗；蔬菜類則在水煮後blend碎，由5小匙增加到10小匙；蛋白質類份量可以在5-10小匙不等。

加固的次數 :

可固定為每日2次，奶品類則改為每日3次。

BB 9-12個月大時

加固的份量  :

澱粉質類食物則可直接煮成粥或軟飯，份量可以成碗上啦；蔬菜類就可keep住食食10小匙；而蛋白質類都係可以食10小匙。

加固的次數 :

可依BB對奶類食品的喜好程度，將固體食物的次數訂為2-3次(如果厭奶比較厲害的BB，就可以只給2次母乳或奶粉)，而奶品類則減為3或2次。媽媽們只要記得副食品與奶品的每日總餐數仍保持5次即可。

睇完之後希望各位媽媽都可以對加固了解多DD啦，唔使好似我最初幫孖寶加固時咁緊張同擔心。 另外，市面上有好多形形式式的產品聲稱係用來給BB進食的，大家要對自己有信心，無人比你更了解你的孩子。唔好受生產商或親友的左右，給了BB錯誤的用具同示範，反而剝奪了BB初期的咀嚼訓練。仲要均衡奶同固體食品的食用次數同份量，唔好勉強，盡力去順勢引導。付出我們媽媽有的最大耐心同信心。 加油

作者：荔枝孖媽