【小小豬】祛濕健脾粟米鮮淮山瘦肉湯
2017-03-10
踏入廿四節氣嘅「春分」，天氣就會開始潮濕，又會導致濕氣重，咁就會成日都攰攰咁(不過我好似一年365日都係攰C哦…哈哈哈)。依個時候就啱晒煲啲健脾祛濕嘅湯水，所以就煲咗依個粟米鮮淮山瘦肉湯啦！
鮮淮山健脾胃；粟米就清熱利尿，同埋有助祛濕；圓肉(即龍眼肉)就有補益心脾，養血安神的功效；陳皮就有化痰嘅功效，而且幾樣食材都好溫純，所以大人同小朋友都好啱飲。(網上資料)
我地三口子份量嘅材料：粟米2條、鮮淮山1支、圓肉約1湯匙、陳皮1片及豬肉眼約$30~
鮮淮山去皮後會有滑潺潺嘅黏液，所以就要戴上手套處理，如果唔係就會痕到冇朋友。我就係之前試過中招，勁痕咗大半日都唔得，所以真係記得要小心呀~ 
粟米去皮切塊；鮮淮山去皮切件~
瘦肉洗淨汆水；圓肉洗淨；陳皮浸軟刮囊~ 
煲內放約3L水，然後隨水加入陳皮~ 
待水煲滾，然後放入所有材料~ 
再煲滾後用大火加蓋煲約15分鐘~ 
之後轉慢火加蓋煲多1.5小時~ 
最後加少少鹽就飲得啦~ 
啖湯味道好清甜，而且又有好香濃粟米味，所以粟米怪嘅小小豬又點會唔鍾意，佢一個人都飲咗兩大碗。除咗湯好飲之外，湯料嘅粟米同鮮淮山都一樣食得，唔好浪費之餘，可以當一個餸，所以依個湯仲唔係十個正…哈哈哈！
溫馨提示：由於個別人仕體質不同，所以大家記得煲之前了解下自己，如有疑問，請先向註冊中醫查詢！
其他湯水：
作者：小小豬的成長日誌
