【小小豬】舒緩喉嚨痛羅漢果杞子菊花茶

我之前都利用過羅漢果煲過唔少湯同涼茶，雖然每次我加埋其他材料煲個味道都係唔錯，不過我家兩位老細一聽到羅漢果就會打咗個折扣，明明好飲都話「下次改煲其他啦」，因為始終佢哋都唔太鍾意羅漢果。

不過老公呢期突然間好愛鍚身體，佢話羅漢果好有益，主動叫我煲俾佢飲(我之前咪煲過….係你唔鍾意咋)。既然佢主動提議，我當然係好樂意煲。其實我都知羅漢果那一種回甘味唔係人人都接受到，我想絕大部分小朋友都一定唔會鍾意，好難叫佢哋乖乖地飲(小小豬當然唔例外，要威迫利誘先肯飲呀)。

為咗要令兩位老細可以飲得開心，所以都要諗小小方法。最後我就請教咗相熟藥材店主，佢就教我煲呢個簡單方便又好飲嘅羅漢果杞子菊花茶！

羅漢果菊花茶對身體都幾好呀，除了聲音沙啞喉嚨不舒服外，對爆肝熬夜及潤喉、明目、養肝都好有幫助(網上資料)。不過羅漢果及菊花嘅屬性都偏涼，所以一定要小心留意自己體質先呀！

只係需要一粒羅漢果、約十蚊嘅菊花同埋一湯匙杞子就可以煲啦~

杞子同菊花就用水浸洗一陣；羅漢果壓碎~

煲內放入3L水，然後加入羅漢果~

待水滾用，用大火加蓋煲約30分鐘~

轉慢火加蓋煲多30分鐘~

之後就再加入菊花及杞子~

最後再煲多十分鐘~

熄火後就要即刻夾起啲材料，因為如果浸得耐，個茶就會有苦澀味~

由於今次加咗菊花關係，所以味道又真係唔錯，一入口就有好香嘅菊花香，就好似飲緊菊花茶咁，但隔一陣就有少少嘅回甘味係喉嚨浮出嚟，飲完喉嚨真係好舒服呀！

哈哈哈…入口真係勁似菊花茶，所以小小豬都唔抗拒，仲不知幾鍾意飲添~

平日彈多過讚嘅老公都話有驚喜，仲已經叫我下次再煲呢個俾佢飲，難得佢咁捧場，我當然好樂意啦！

溫馨提示：由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！ ！

作者：小小豬的成長日誌

按此可以進入小小豬FACEBOOK，齊齊來交流親子。育兒。烹飪啦~~>