【試用報告】醫管局新產科app 多功能、有齊公立婦產科資料！

醫管局推出產科App「喜程」，今日起App Store及Google Play都有得下載。我哋都立即download嚟睇下，亦問咗新手媽媽嘅意見，相比起之前要download外國app，呢個app似乎比較貼地，不但集多功能，仲有晒公立婦產科資料。不過呢個App都唔係完美，想知呢個App啱唔啱你用？而家立即介紹！

▲應用程式全名：HApi Journey 喜程

一開App，大家要先設定預產期。未知幾時，可以輸入上一次經期；之後大家就要從全港嘅公立婦產科中，選定一間「我的醫院」。

之後就會入到主頁（下圖左）。主頁內有圖示，可以輸入血糖及血壓資料。大家之後使用程式內嘅日程工具後，都可以喺主頁睇到提示（下圖右）。

準媽媽好多嘢要記，除咗檢查時間、血壓外，若有妊娠糖尿更要紀錄血糖，分娩前又要紀錄陣痛時間。

囡囡6個月大嘅TT媽媽同我哋分享，舊年大肚期間佢用咗簿仔記錄血糖、手機日曆記低檢查時間，另外亦有download外國的陣痛時計…… 今次醫管局呢個app有8個工具，相信能夠迎合媽媽大部分需要，點選主頁底部的「工具」（見上圖），就可以搵得到。不過話時話，唔見有得紀錄體重喎……

婦產科資訊

大家要搵婦產科資訊，之前可能會靠google，而家一app在手就搵得到，錯嘅機會亦大大減少，仲可以睇定婦產科嘅相。

產前檢查日程

日程有得揀類型，如「唐氏綜合症檢查」以及最邪惡嘅「飲糖水」，呢啲選擇外國app唔會搵得到，系統又會自動根據「我的醫院」設定地址，大家可以set定鬧鐘作提示。

入防分娩準備

執好咗要剔一剔；過來人TT媽媽睇過，覺得清單都幾齊全，不過內衣一欄就冇提準媽媽帶網褲，記得買埋！

下頁：仲有咩工具？好唔好用？