【Lilian Chen】小朋友定會愛上的五間美術館（一）
2017-03-10
幾年前我出了一本「蠅級」的親子藝術書，其中有一章是講如何培養孩子對藝術的興趣，提到一些美術館，當時都引來衆多爸媽和媒體的查詢。其實呢幾年，除咗我哋香港西九文化區蹉跎又蹉跎，好多國家又靚又得的美術館起了一間又一間。開呢個專欄，的起心肝，重新來過，推介五間美術館，各位虎媽做旅遊Plan可參考！
聲明一下，遊客洶湧的有名美術館全部不入我法眼，你可以話我「識小小扮專家」，但做為過來人媽媽，我深知帶「馬騮仔」四周玩的疲累，所以精選原則係：遊客不太多不擁擠；半日可以完成；未必好多收藏，但為小朋友帶來特別藝術欣賞角度；舘内有好玩的元素或是有戶外區；提供豐富有趣的親子教育工作坊；附屬的餐廳又好坐又舒服；最後一點好重要，入舘的飛最好平的、甚至免費！
我好貼地，今日先揀個香港爸媽外遊的熱門地點 – 日本東京。東京郊區不到一個小時火車就可以去到著名的溫泉度假地 – 箱根。我要介紹的呢間美術館就在這個有山有湖的風景秀美之處。
呢間名為「 雕刻之森」的戶外雕塑美術館，很多旅遊雜誌和達人有介紹過，但我點都要攞出來「翻叮」，因爲佢具備以下幾大元素，係爸媽帶孩子去美術館的入門首選。
一．呢間雕塑美術館創立之時，開先河以公園式設計來考慮佈局和陳列，也考慮了很多親子及家庭遊玩的元素，專登請藝術家設計了一D可以玩的雕塑(Play Sculpture)，包括「泡泡之城」、「星之庭」迷宮等等。小朋友去到，好似入咗一個大的遊樂場，跑來跑去，爬上爬下，不亦樂乎。可惜的是，日本編織藝術家Toshiko Horiuchi-MacAdam (堀內紀子)設計的大型軟雕塑 - 「網之森林」，因爲安全考慮，已於２０１５年被舘方關閉。前幾年帶兩個孩子去玩，佢哋最愛的就係呢個色彩繽紛的大繩網。去年IFC有邀請堀內紀子做了一個小型的類似作品，不知爸媽當時有無帶小朋友玩？
二．佢係日本規模最大的雕塑美術館，在日本經濟泡沫時期買下的收藏品逾４００件，基本上全球最頂尖雕塑家的作品都可以喺度揾到。各種材料、各種題材、各種風格，可以令孩子大開眼界。重點欣賞下英國亨利摩爾（全球最豐富的亨利摩爾收藏）和法國羅丹的青銅雕塑，同樣是人像，前者現代，後者深受文藝復興古羅馬雕塑影響，可以啓發小朋友自己比較下；意大利雕塑家Arnaldo Pomodoro的「 Sphere Within Sphere」，和聯合國門口的作品同是一組，孩子在球體金屬表面看到印射的自己和大自然，不停變化，好玩得很。
三．園内還有一個畢加索舘收藏了畢的陶藝、版畫和一小部分繪畫作品。可帶小朋友順便一看畢加索，你會發現越細的小朋友越中意畢加索，學佢將唔同角度放在同一畫面的立體派作品，個個一畫就上手。一支蠟筆一張紙，你大可鼓勵你的孩子畫一張畢加索風格的媽媽送給你。
(我囡囡5嵗時畫的立體派自畫像)
四．雕塑公園内有間簡餐餐廳，如在森林之中，坐得舒服。簡單蛋包飯、蛋糕，小朋友覺得好好味。從東京去可以即日往返，想要住一晚，附近好多溫泉酒店好靚。
最後，講番我成日鼓勵爸媽帶小朋友去美術館的一個重要原因係：得罪的講句，你要你小朋友曉飛，但自己又從來唔去行下呢的地方，至少認識下點解哥哥－張國榮都至愛亨利摩爾，自己飲飲食食、八八卦卦，但又要小朋友文武雙全，間間名校爭住收，有的天方夜譚，講完。
作者：Lilian Chen