【小小豬】潤肺去燥 : 竹蔗薏米雪梨茶
2017-02-19
依排嘅天氣真係勁討厭，除左天氣過山車之外，一時又乾一時又濕，真係令人唔知想點咁。天氣一大起大落嘅時候，我就會好擔心小小豬個濕疹壞朋友又嚟攪佢。所以趁未有啲咩異樣嘅時候，快快手煲定啲滋潤涼茶俾佢飲，打好個底咁就唔洗壞朋友攪攪陣啦！
依款竹蔗薏米雪梨茶，用左去燥又潤肺嘅雪梨作為主料，再加上清熱降火嘅甘蔗同埋清熱利水祛濕嘅薏米，咁就有益得嚟又清甜好味，而且又非常適合係乾燥時飲用呀！
材料：甘蔗一扎、馬碲約八粒、薏米約兩湯匙、雪梨四個、海底椰一兩及冰糖~
薏米洗淨後，最少要浸30分鐘；海底椰洗淨；馬碲去皮~
竹蔗洗淨破開兩邊；雪梨洗淨後切塊去芯~
煲內放入約3L水，隨水加入薏米~
待滾起後，加入其他材料(冰糖除外)~
用大火加蓋煲約15分鐘~
之後再轉慢火加蓋煲多45分鐘~
依個時候就可以因應個人口味加入冰糖，再煲多15分鐘~
最後再焗15分鐘，隔渣後就可以飲得啦~
小小豬一向都幾鐘意飲竹蔗類飲品(哈哈…即係同我一樣)，今次加埋佢都成日飲嘅雪梨，當然就一定冇問題，味道就清清甜甜，佢又點會抗拒，仲不知幾鐘意，已經叫我下次再煲依款涼茶。佢咁嘗面我就當然冇問題，反正其實諗煲咩又真係幾頭痛，試過一星期冇煲涼茶依隻豬仔就會投訴，依家知佢鐘意依款就緊係煲多啲…諗少啲啦！
溫馨提示：雖然各種食材都係好溫純，不過始終個人體質都有所不同，我啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
更多小小豬的湯水:
作者：小小豬的成長日誌