【小小豬】清心潤肺：猴頭菇粟米蘋果素湯
2017-02-11
新年嘅時候每餐都大魚大肉，老公都話依排要煮返多啲清淡菜式中和返。既然餸菜要清淡，咁湯都一樣要清清地啦。所以今日就煲左個既清心潤肺又可以利五臟助消化嘅猴頭菇粟米蘋果素湯，等大家素一素啦！
猴頭菇真係好有益，佢含不飽和脂肪酸，能降低血膽固醇和甘油三酯含量，調節血脂，利於血液循環，是心血管患者的理想食品；而且具有提高肌體免疫力功能；最重要係猴頭菇是一種高蛋白、低脂肪、富含礦物質和維生素，係一種優良食品嚟呀！(網上資料)
紅蘋果3個、猴頭菇2個、粟米1條半、無花果6粒及白蓮子、百合各1兩~
猴頭菇用水浸軟(最少30分鐘)，然後擠乾水份，撕成小塊；其他藥材就洗淨~
唔怕長氣都要再提一提，煲湯最好就係用蛇果，同埋要係洗蘋果前會用刀刮一圈，刮走那一層果蠟，咁連皮煲湯時就可以飲得安心啲啦~
蘋果去芯切成小塊；粟米去皮切塊~
煲內放入3公升水，隨水將所有材料加入煲內~
待水滾後，用大火加蓋煲約15分鐘~
然後轉慢火加蓋煲多1小時15分鐘~
有需要就可以加少少鹽調味，不過我個人就覺得唔落都鹽都得，因為甜甜地都好好飲呀~
平日我都比較煲素湯，因為我地三口子都係食肉獸，總係覺得有肉落肚先叫好。就算煲都係只煲比較濃味嘅紅菜頭，不過原來素湯都一樣好飲，只係少左肉湯嘅一份肉味。老公都叫我多啲煲素湯，可以飲得清淡又健康呀！
更多小小豬的湯水:
作者：小小豬的成長日誌
