【小小豬】止咳平喘改善食慾: 蘋果雪梨靈芝茶
2017-02-08
屋企大掃除時搵到仲有一小包靈芝片(放心….仲未過期的…哈哈)，為免浪費都係時候煲埋佢。不過上次煲靈芝羅漢果茶時，小小豬雖然都肯飲，不過佢始終對烏卒卒嘅顏色有點抗拒。為免佢俾啲顏色嚇親，所以就請教相熟朋友，最後佢就教我加埋蘋果同雪梨一齊煲！
靈芝屬性平，有助養心安神、補益氣血、止咳平喘、改善食慾不振及消化不良。雖然用途好廣亦都係好有益，不過就味道帶點甘苦，所以直接焗茶煲水飲就比較難入口。今次加左雪梨、蘋果同無花果之後，既清甜潤喉，而且佢地嘅甜味能平衡靈芝嘅甘苦味，最重要係唔再烏卒卒，大人小朋都友都啱飲啦！
材料有：靈芝片約10g、雪梨4個、蘋果4 個、無花果5 粒、南北杏兩湯匙及雪梨乾幾片~ 
靈芝片、南北杏及雪梨乾浸洗一陣；蘋果及雪梨去芯切塊洗淨~ 
煲內放4L水，然後加入所有材料~ 
待煲滾後，用大火加蓋煲約15分鐘~ 
再轉小火加蓋煲多1小時~ 
熄火後要即刻夾起啲材料(尤其係啲靈芝片)，否則浸得太耐，茶的苦澀味就會重~ 
最後隔渣就可以飲得啦~ 
味道又係點呢？其實入口又真係飲唔出嗰一陣靈芝味，反而就似係飲緊蘋果雪梨水，甜甜地好易入口，最重要當然係小小豬完全零抗拒，所以下次再煲靈芝茶就可以用依個方法！
溫馨提示：由於材料都涉及藥材成分，始終個人體質都有
更多小小豬的湯水:
所不同，我地啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己先啦！
作者：小小豬的成長日誌