【小小豬】增強抵抗力 魚腥草竹蔗茶
2017-02-05
早前約左朋友去油糖TEA時，見仲有少少時間我就入去街市八卦下，就係咁我又學識煲多款既可以滋潤降火，又增強抵抗力嘅魚腥草竹蔗茶。
聽左店主介紹，又好似幾好咁(最重要就係唔難煲)，所以就請佢幫我執左一份材料返去煲俾兩位老細飲啦！
今次嘅主角就係魚腥草，其實我之前都只係聽過，但就真係完全冇接觸或者有諗過用嚟煲涼茶。聽店主講原來魚腥草係非常好，可以話係天然第一抗生素，飲左就可以增強免疫力，同時照顧我地嘅呼吸系統，而且亦具有消炎作用，所以對感冒、傷風、咳嗽及喉嚨發炎都好有幫助。
煲嘅同時加埋青橄：對喉嚨有消炎消腫；糖冬瓜：清熱降火，稀釋濃痰易咳出；竹蔗：清熱降火、生津止喝，所以煲出嚟就會非常清甜而且仲好有益，大人同小朋友都啱飲呀！
魚腥草約半斤、竹蔗一扎、青橄約20粒及糖冬瓜一小包~
由於係根莖關係，所以就要洗得乾淨啲，我就慢慢洗將啲小根都除走，白雪雪感覺好似好啲~
將所有魚腥草洗乾淨~
青欖用刀背略拍扁；竹蔗洗淨破開兩邊~
煲內放約4L水，然後隨水加入所有材料(糖冬瓜除外)~
待滾起後，用大火加蓋煲約30分鐘~
之後加入糖冬瓜~
再轉慢火加蓋煲多1小時30分鐘~
最後再焗15分鐘，隔渣後就可以飲得啦~
其實係煲嘅過程都有丁點擔心，唔知個味會係點？好驚會有一陣腥？不過飲左第一啖就真係完全疑惑全消，因為真係超級清甜，又有好香竹蔗味，就連小小豬都不知幾鐘意飲呀~
味道唔錯之餘，飲完喉嚨仲好舒服，我諗好啱新年過後，食完咁多熱氣食物要潤一潤啦！
溫馨提示：雖然各種食材都係好溫純，不過始終個人體質都有所不同，我啱飲時又未必每個人都啱，所以大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
更多小小豬的湯水:
作者：小小豬的成長日誌
