【小小豬】鮮雪耳蘋果雪梨湯
2017-01-01
由肥媽節目到近期嘅阿爺廚房，睇見佢地都有用新鮮雪耳嚟煮餸。其實我都不知幾想又跟風買嚟煮下，不過屋企附近又冇得買，所以一直都只係得個想字。終於前幾日同老公去行九龍城時，係街旁嘅有機店俾我見到，我當然就係諗到唔洗諗買左一朵返屋企啦！
嘩…一整粒嘅新鮮雪耳就好似一個繡球花咁，真係好靚呀~
原來我都想跟鼎爺整嗰一個鮮雪耳糖水，不過糖水一向都唔係兩位老細杯茶，為免煲左之後要我一個人食晒，所以安全啲都用嚟煲湯好(唔洗我一個人獨食狂肥嘛…哈哈哈)。
依幾日天氣都好乾燥，我同小小豬個咀都開始有少少爆拆，所以就煲鮮雪耳蘋果雪梨湯，既可以滋潤美顏，又養陰潤肺，而且清甜潤喉，啱晒我地三口子潤一潤呀！
材料就有：鮮雪耳1朵、蘋果3個、雪梨2個、雪梨乾6-7片、無花果4粒、南北杏、白蓮子及百合各1兩及瘦肉約$30~
瘦肉洗淨汆水備用；雪梨乾、南北杏、白蓮子及百合浸洗一陣，記得要望一望蓮子入面嘅蓮芯清除晒未，如果加埋依啲蓮芯一齊煲湯，就會令到湯帶有苦味~
蘋果及雪梨去芯切塊洗淨，唔怕長氣都要再提一提，記得要係洗蘋果前會用刀刮一圈，刮走嗰一層果蠟~
新鮮雪耳就唔洗浸，不過就要好小心咁清洗，因為會有啲泥係啲夾住喺啲花瓣度 清洗好晒之後，就可以去蒂切細舊~
煲內放約3L水，水滾後放入所有材料(新鮮雪耳除外)~
待再次滾起時，用大火加蓋煲約15分鐘~
再轉慢火加蓋煲45分鐘~
依個時候就可以加入新鮮雪耳，如果太早加入新鮮雪耳，就會煲到溶晒，咁成個湯就會好似漿糊，即刻影響晒個口感。所以係最後30分鐘加入，咁就時間剛剛，就可以帶出新鮮雪耳嘅味，整啖湯就更加好飲啦~
之後再煲多20分鐘，最後加少少鹽就飲得啦~
一知道係蘋果湯，小小豬都已經不知幾鐘意飲。一話食雪耳會變靚仔，小小豬就不停密密食，真係俾依隻傻豬仔笑C呀…哈哈哈~
其實我個人覺得用左新鮮雪耳啖湯就好似清啲，但老公就話分別不大。但食雪耳時又真係覺得爽口啲，所以都叫唔錯啦！
溫馨提示：
-由於材料都涉及藥材成分，所以係好因應個人體質，大家記得煲之前了解下自己，或者問下相熟中醫/藥材店職員，呢個湯料啱唔啱自己呀！
-煲過嘅雪耳一定要即日食/飲晒，如果隔夜，經過一夜嘅浸透，佢就會放出一啲有害物，到時就有益變有害啦！
更多小小豬的湯水:
作者：小小豬的成長日誌
作者：小小豬的成長日誌
