【傻夫婦】星期六好煮意 （附羅宋湯食譜）
2016-11-30
2016年11月26日（星期六）
湊大頭妹小丸子，能親力親為的，我都希望自己做，不會假手於工人姐姐！今日大頭妹學校長週，一早6:45起牀，7:30送大頭妹上校車，8:30再送小丸子上興趣班，9:30返到屋企，又無理由瞓番，所以走去買餸預備晚餐！
這幾天天氣轉冷，忽然好想飲羅宋湯！冬天飲羅宋湯，特別暖笠笠﹗而且我哋大人細路，平時都可能食得少蔬菜，飲羅宋湯，可以一次過吸收大量蔬菜﹗
煲得羅宋湯，就當然食西餐，好耐無焗全雞，呵呵呵，驚唔夠飽，叫工人姐姐預備意粉，雪櫃仲有買了差不多一個星期的三色椒，哈哈哈，焗埋佢！
檸檬蜜糖焗雞，影相出來比較黑，事實上剛剛好，皮好香，好好味！
工人姐姐牌肉醬意粉！好好味架！
大頭小丸好識食，仲要加芝士！
焗三色椒，加少少葡萄籽油（甚麼油也可以）、少少鹽，焗15分鐘，即刻變得又香、又甜、又好味！最重要是方便快捷，用普通多士爐焗都可以！
中式羅宋湯，今次寫咗食譜！
中式羅宋湯
材料：
牛腩 $80/ 洋蔥1個/紅蘿蔔 1條/西芹 1/4條/ 薯仔 2個/ 番茄 4個/ 椰菜 半個/ 香葉 2片/ 番茄膏 1罐
做法：
1. 牛腩飛水洗淨切粒備用 。
2. 所有蔬菜洗淨切粒備用。
3. 湯煲中加入油爆香洋蔥、紅蘿蔔、西芹、番茄、牛腩炒香。
4. 加入適量清水煲以高速煲煲1小時 （普通煲煲2.5小時）。
5. 加入薯仔、椰菜，番茄膏﹑鹽﹑糖，大火煲 30分鐘。
*我個煲就 7L，我加水去到 MAX 線，如果用普通煲，大約 4 -5 L水，大家自己預啦﹗最好用大湯煲啦﹗
作者：傻夫婦一家四口生活日誌
相關文章：