【小小豬】簡單易滾西洋菜肉片湯
2016-11-23
行街市見到好靚嘅西洋菜，真係勁有衝動買嚟煲湯。但星期五我又要返小小豬學校做午膳姨姨，要煲老火湯就真係唔多夠時間。
唔可以煲老火湯啫，但用西洋菜嚟滾個方便湯都唔錯，仲可以當埋一個餸，真係慳水慳力，所以就整個簡簡單單嘅西洋菜肉片湯止一止我個心癮啦！
話明係簡易靚湯，材料就真係勁簡單，西洋菜1斤、豬肉片約$20及薑數片~
西洋菜用鹽水浸洗一陣，然後清洗乾淨備用~ 
豬肉片用2茶匙生抽、半茶匙黃糖、少少紹興酒及1 茶匙油醃約最少30分鐘；薑切數薄片~ 
煲內加入約2L水，然後加入薑片(由於西洋菜本身係帶點寒涼，所以如果以滾湯方式一定要加薑片呀)~ 
當水滾起後就可以加入西洋菜，待再滾起後就轉細火加蓋煲30分鐘~ 
最後加入肉片煲多15分鐘~ 
落少少鹽調味就可以開餐啦~ 
西洋菜真係唔輸得(可能我內心深處最鐘意嘅湯嚟啦)，今次都只係滾我都覺得好好味，睇嚟真係要搵日煲返個足火喉嘅西洋菜老火湯先得呀！
更多小小豬的湯水:
作者：小小豬的成長日誌
