【小小豬】健脾益胃淮山黨參瘦肉湯
2016-11-20
雖然平日小小豬都係為食豬上身，不過唔知做乜依排食得都唔係咁好，午餐食成點我就唔多知，以晚餐計又真係好麻麻，成日食到半碗飯之後就關始發夢，之後就會話好飽飽，每晚都要對抗下先完成晚餐。
小小豬飲食習慣都有規矩，所以都應該唔關係零食影響，佢又冇唔舒服，所以都應該唔係作病，所以就煲過開胃湯水俾佢飲，睇下可唔可以有點點幫助啦！
淮山有助健脾益胃，黨參就可以治脾胃虛弱，而玉竹沙參就對滋陰益氣有幫助，所以加埋一齊就係健脾開胃靚湯。
材料包括淮山、黨參、玉竹、沙參及圓肉各1兩(一兩相等於37.5g)及瘦肉約$40。我依個就係三口子份量，加埋大約有六至七碗湯啦。唔好以為有參類嘅材料係會好貴，我係藥材店買依一份材料都唔洗$40~
瘦肉洗淨汆水；其他材料就浸洗備用~ 
煲內放約3L水，待滾起時，加入所有材料~ 
然後用大火加蓋煲約15-20分鐘~ 再轉慢火加蓋煲多1.5小時~ 
最後加少少鹽調味就飲得~ 
啖湯清清地，其實都幾好飲，當然小小豬都一樣好鐘意，唔洗我提就飲左兩大碗~
飲完有冇變返好胃口？都係老公名句….飲完即刻見效你就驚啦！不過我都係認為湯水都係以保健為主，平日勤力啲就煲湯，為我家兩位老細打好個底就係我嘅目標！
更多小小豬的湯水:
作者：小小豬的成長日誌
