家長爆料：培正幼稚園 面試考啲乜?
2016-09-23
城中「超級一條龍」老牌名校香港培正小學（幼稚園），日前在招生通告中公布，由17/18學年起，只有85%的幼稚園畢業生可以升上小一，消息未知會否震驚爸媽們13億細胞？ 雖然「直升神話」將被打破，但身邊一眾馬B爸媽仍然無畏無懼「迎難而上」、積極打聽培幼考啲乜！《Oh！爸媽》請來培幼家長梁太話你知！
金漆紅藍招牌並非浪得虛名
位於九龍城的培正屬老牌名校，人材輩出，更重要是絕大部分幼稚園生可直升中學，只要成功將孩子送進去後幾乎一勞永逸——往後18年再不用為升學事煩惱頻撲，難怪校方過去每年都收到逾5000份申請表。按上、下午班共248個學額計，平均每20個兩歲人仔爭1個位，相信升小比例下調無損其受追捧程度。
^培正幼稚園及小學校長張廣德
幼稚園及小學校長張廣德，曾經在不同場合分享培幼面試內容：「孩子的溝通能力、態度是主打，老師會考小朋友的即時反應⋯」究竟真定假？
「同校長講嘅一樣！」梁太兩個仔相差兩年，分別在培幼讀K1及K3。大仔入讀培幼前，考過十間不同名牌幼稚園，但因為丈夫為培正校友，紅藍兒女歸屬感驅使下，最終扑槌培幼，細仔自然緊隨其後。
有心入報名表要俾心機填！
孩子面試之前，報考培幼的爸媽們已要參加筆試pre-in——寄信拿到報名表後，除基本資料，爸媽們亦要回答4至5題育兒題目。雖然相隔兩年，梁太指兩兄弟的報名表問題大致相同，去年的題目包括：
- 期望中幼稚園老師特質
- 對學校教學內容的看法
- 孩子做錯事，你會怎處理？
「最重要睇家長湊小朋友嘅方法！」梁太指為大仔報過的名牌幼稚園當中，不少在報名表上都附有此類考家長的問題，培幼之外民生都以同一做法了解一眾準家長 。「有心入要畀心機填！老師會睇嘅，無model answer，唔好期望『答中』，誠意最緊要！」她認為熟書、能展現家長有心培育孩子的話會較易於首圈突圍，故要認真、扼要表明心跡。