【慈慧幼苗】父母企硬真係好？
2017-06-16
大哥近日「上車」新屋入伙，我與爸媽到他新居house warming，甫出電梯已聽見小朋友哭聲。大哥開門之後，我望見侄女淇淇雙眼含淚望住大嫂，而大嫂就一副嚴肅表情：「你之前都已經唔使我餵，話可以自己食飯㗎啦，唔准再扭計！」
大哥見我和爸媽到訪，都想盡快安撫阿女，企圖餵阿女食飯，大嫂立即阻止：「唔好餵啊﹗我訓練咗佢好耐先肯自己食㗎，夠鐘我就收碗！」
大哥想為阿女「求情」：「已經第二日，我哋唔餵佢，佢又唔肯自己食喎，怕唔怕餓親佢呢？」
大嫂繼續堅定立場：「好似執玩具咁，佢玩完一定要佢自己執，係佢自己嘅責任嚟。食飯都一樣，要佢自己完成！佢前幾日發高燒就話餵佢啫，而家都已經病好，退咗燒，當然要自己食飯㗎啦！」
原來侄女剛剛病完，難怪「咁嗲」！嫲嫲就發表意見：「哎唷！B女病嘅時候一定好唔舒服，梗係想嗲吓爸爸媽媽。嗱！嫲嫲都好肚餓喎！不如今次我同淇淇一齊食飯，我餵一啖俾淇淇，淇淇又餵我食飯啦！好唔好啊？」淇淇這時候又真是不再哭，肯與嫲嫲你一啖我一啖地食飯，最後個幾啖仲要自己食添。大嫂與大哥看到這情境，都講不出聲！
解說：
當小朋友唔肯自己食飯嘅時候，父母要先了解佢唔肯自己食飯嘅原因，要適時檢討及按情況調整對小朋友嘅期望。如果小朋友平時做得到的良好行為，突然唔願意做嘅話，父母就要留意小朋友嘅狀態，睇下「前因」同「後果」有咩事發生，同時估算一下佢嘅需要。
例如以上琪琪嘅例子，小朋友因病好之後，仍然想依賴一下爸媽，渴望透過媽媽餵飯之過程，以滿足安撫與關懷嘅需要。當然，大嫂堅持想小朋友能完成自己的責任的原則亦冇錯，但生病時父母餵咗好幾日，突然要小朋友自己食番，小朋友剛病好，可能就會比較困難。如果大家都拉鋸，既滿足唔到小朋友需要，亦滿足唔到媽媽想要小朋友負責任嘅諗法。當然，父母可以用「自食其果」嘅方式令小朋友承擔自己後果，但有時家長亦應按小朋友嘅情況稍作調整。就好似嫲嫲咁，餵一啖俾佢之後，可邀請小朋友餵一啖俾嫲嫲。一來可以滿足到小朋友安撫同關懷嘅需要，同時亦要小朋友有所付出去食飯，一步步鼓勵同建立番小朋友自己食飯嘅習慣。
個案及解說由慈慧育兒社工Ka Ka提供
慈慧幼苗互動資源平台babyparent.org，教你把握小朋友6歲前嘅黃金期，由香港理工大學同香港大學【教兒樂】專責社工主理育兒管教環節，香港大學李嘉誠醫學院兒科教授負責嬰幼兒醫護範疇，滙聚資深教育心理學家同言語治療師等，為你提供免費同及時嘅專業解答。
歡迎你like我哋Facebook Fan Page：Healthy Seed Parenting。
作者：慈慧幼苗
相關文章：